Sacred Texts  Bible  Index 
Polyglot  KJV  Sep  Vul 

Exodus (Shemot) Index
  Previous  Next 

Tanach (Hebrew): Exodus (Shemot) Chapter 30

1 ‏וְעָשִׂ֥יתָ מִזְבֵּ֖חַ מִקְטַ֣ר קְטֹ֑רֶת עֲצֵ֥י שִׁטִּ֖ים תַּעֲשֶׂ֥ה אֹתֽוֹ׃

2 ‏אַמָּ֨ה אָרְכּ֜וֹ וְאַמָּ֤ה רָחְבּוֹ֙ רָב֣וּעַ יִהְיֶ֔ה וְאַמָּתַ֖יִם קֹמָת֑וֹ מִמֶּ֖נּוּ קַרְנֹתָֽיו׃

3 ‏וְצִפִּיתָ֨ אֹת֜וֹ זָהָ֣ב טָה֗וֹר אֶת־גַּגּ֧וֹ וְאֶת־קִירֹתָ֛יו סָבִ֖יב וְאֶת־קַרְנֹתָ֑יו וְעָשִׂ֥יתָ לּ֛וֹ זֵ֥ר זָהָ֖ב סָבִֽיב׃

4 ‏וּשְׁתֵּי֩ טַבְּעֹ֨ת זָהָ֜ב תַּֽעֲשֶׂה־לּ֣וֹ׀ מִתַּ֣חַת לְזֵר֗וֹ עַ֚ל שְׁתֵּ֣י צַלְעֹתָ֔יו תַּעֲשֶׂ֖ה עַל־שְׁנֵ֣י צִדָּ֑יו וְהָיָה֙ לְבָתִּ֣ים לְבַדִּ֔ים לָשֵׂ֥את אֹת֖וֹ בָּהֵֽמָּה׃

5 ‏וְעָשִׂ֥יתָ אֶת־הַבַּדִּ֖ים עֲצֵ֣י שִׁטִּ֑ים וְצִפִּיתָ֥ אֹתָ֖ם זָהָֽב׃

6 ‏וְנָתַתָּ֤ה אֹתוֹ֙ לִפְנֵ֣י הַפָּרֹ֔כֶת אֲשֶׁ֖ר עַל־אֲרֹ֣ן הָעֵדֻ֑ת לִפְנֵ֣י הַכַּפֹּ֗רֶת אֲשֶׁר֙ עַל־הָ֣עֵדֻ֔ת אֲשֶׁ֛ר אִוָּעֵ֥ד לְךָ֖ שָֽׁמָּה׃

7 ‏וְהִקְטִ֥יר עָלָ֛יו אַהֲרֹ֖ן קְטֹ֣רֶת סַמִּ֑ים בַּבֹּ֣קֶר בַּבֹּ֗קֶר בְּהֵיטִיב֛וֹ אֶת־הַנֵּרֹ֖ת יַקְטִירֶֽנָּה׃

8 ‏וּבְהַעֲלֹ֨ת אַהֲרֹ֧ן אֶת־הַנֵּרֹ֛ת בֵּ֥ין הָעֲרְבַּ֖יִם יַקְטִירֶ֑נָּה קְטֹ֧רֶת תָּמִ֛יד לִפְנֵ֥י יְהוָ֖ה לְדֹרֹתֵיכֶֽם׃

9 ‏לֹא־תַעֲל֥וּ עָלָ֛יו קְטֹ֥רֶת זָרָ֖ה וְעֹלָ֣ה וּמִנְחָ֑ה וְנֵ֕סֶךְ לֹ֥א תִסְּכ֖וּ עָלָֽיו׃

10 ‏וְכִפֶּ֤ר אַהֲרֹן֙ עַל־קַרְנֹתָ֔יו אַחַ֖ת בַּשָּׁנָ֑ה מִדַּ֞ם חַטַּ֣את הַכִּפֻּרִ֗ים אַחַ֤ת בַּשָּׁנָה֙ יְכַפֵּ֤ר עָלָיו֙ לְדֹרֹ֣תֵיכֶ֔ם קֹֽדֶשׁ־קָֽדָשִׁ֥ים ה֖וּא לַיהוָֽה׃ פ

11 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

12 ‏כִּ֣י תִשָּׂ֞א אֶת־רֹ֥אשׁ בְּנֵֽי־יִשְׂרָאֵל֮3 לִפְקֻדֵיהֶם֒ וְנָ֨תְנ֜וּ אִ֣ישׁ כֹּ֧פֶר נַפְשׁ֛וֹ לַיהוָ֖ה בִּפְקֹ֣ד אֹתָ֑ם וְלֹא־יִהְיֶ֥ה בָהֶ֛ם נֶ֖גֶף בִּפְקֹ֥ד אֹתָֽם׃

13 ‏זֶ֣ה׀ יִתְּנ֗וּ כָּל־הָעֹבֵר֙ עַל־הַפְּקֻדִ֔ים מַחֲצִ֥ית הַשֶּׁ֖קֶל בְּשֶׁ֣קֶל הַקֹּ֑דֶשׁ עֶשְׂרִ֤ים גֵּרָה֙ הַשֶּׁ֔קֶל מַחֲצִ֣ית הַשֶּׁ֔קֶל תְּרוּמָ֖ה לַֽיהוָֽה׃

14 ‏כֹּ֗ל הָעֹבֵר֙ עַל־הַפְּקֻדִ֔ים מִבֶּ֛ן עֶשְׂרִ֥ים שָׁנָ֖ה וָמָ֑עְלָה יִתֵּ֖ן תְּרוּמַ֥ת יְהוָֽה׃

15 ‏הֶֽעָשִׁ֣יר לֹֽא־יַרְבֶּ֗ה וְהַדַּל֙ לֹ֣א יַמְעִ֔יט מִֽמַּחֲצִ֖ית הַשָּׁ֑קֶל לָתֵת֙ אֶת־תְּרוּמַ֣ת יְהוָ֔ה לְכַפֵּ֖ר עַל־נַפְשֹׁתֵיכֶֽם׃

16 ‏וְלָקַחְתָּ֞ אֶת־כֶּ֣סֶף הַכִּפֻּרִ֗ים מֵאֵת֙ בְּנֵ֣י יִשְׂרָאֵ֔ל וְנָתַתָּ֣ אֹת֔וֹ עַל־עֲבֹדַ֖ת אֹ֣הֶל מוֹעֵ֑ד וְהָיָה֩ לִבְנֵ֨י יִשְׂרָאֵ֤ל לְזִכָּרוֹן֙ לִפְנֵ֣י יְהוָ֔ה לְכַפֵּ֖ר עַל־נַפְשֹׁתֵיכֶֽם׃ פ

17 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

18 ‏וְעָשִׂ֜יתָ כִּיּ֥וֹר נְחֹ֛שֶׁת וְכַנּ֥וֹ נְחֹ֖שֶׁת לְרָחְצָ֑ה וְנָתַתָּ֣ אֹת֗וֹ בֵּֽין־אֹ֤הֶל מוֹעֵד֙ וּבֵ֣ין הַמִּזְבֵּ֔חַ וְנָתַתָּ֥ שָׁ֖מָּה מָֽיִם׃

19 ‏וְרָחֲצ֛וּ אַהֲרֹ֥ן וּבָנָ֖יו מִמֶּ֑נּוּ אֶת־יְדֵיהֶ֖ם וְאֶת־רַגְלֵיהֶֽם׃

20 ‏בְּבֹאָ֞ם אֶל־אֹ֧הֶל מוֹעֵ֛ד יִרְחֲצוּ־מַ֖יִם וְלֹ֣א יָמֻ֑תוּ א֣וֹ בְגִשְׁתָּ֤ם אֶל־הַמִּזְבֵּ֙חַ֙ לְשָׁרֵ֔ת לְהַקְטִ֥יר אִשֶּׁ֖ה לַֽיהוָֽה׃

21 ‏וְרָחֲצ֛וּ יְדֵיהֶ֥ם וְרַגְלֵיהֶ֖ם וְלֹ֣א יָמֻ֑תוּ וְהָיְתָ֨ה לָהֶ֧ם חָק־עוֹלָ֛ם ל֥וֹ וּלְזַרְע֖וֹ לְדֹרֹתָֽם׃ פ

22 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

23 ‏וְאַתָּ֣ה קַח־לְךָ֮ בְּשָׂמִ֣ים רֹאשׁ֒ מָר־דְּרוֹר֙ חֲמֵ֣שׁ מֵא֔וֹת וְקִנְּמָן־בֶּ֥שֶׂם מַחֲצִית֖וֹ חֲמִשִּׁ֣ים וּמָאתָ֑יִם וּקְנֵה־בֹ֖שֶׂם חֲמִשִּׁ֥ים וּמָאתָֽיִם׃

24 ‏וְקִדָּ֕ה חֲמֵ֥שׁ מֵא֖וֹת בְּשֶׁ֣קֶל הַקֹּ֑דֶשׁ וְשֶׁ֥מֶן זַ֖יִת הִֽין׃

25 ‏וְעָשִׂ֣יתָ אֹת֗וֹ שֶׁ֚מֶן מִשְׁחַת־קֹ֔דֶשׁ רֹ֥קַח מִרְקַ֖חַת מַעֲשֵׂ֣ה רֹקֵ֑חַ שֶׁ֥מֶן מִשְׁחַת־קֹ֖דֶשׁ יִהְיֶֽה׃

26 ‏וּמָשַׁחְתָּ֥ ב֖וֹ אֶת־אֹ֣הֶל מוֹעֵ֑ד וְאֵ֖ת אֲר֥וֹן הָעֵדֻֽת׃

27 ‏וְאֶת־הַשֻּׁלְחָן֙ וְאֶת־כָּל־כֵּלָ֔יו וְאֶת־הַמְּנֹרָ֖ה וְאֶת־כֵּלֶ֑יהָ וְאֵ֖ת מִזְבַּ֥ח הַקְּטֹֽרֶת׃

28 ‏וְאֶת־מִזְבַּ֥ח הָעֹלָ֖ה וְאֶת־כָּל־כֵּלָ֑יו וְאֶת־הַכִּיֹּ֖ר וְאֶת־כַּנּֽוֹ׃

29 ‏וְקִדַּשְׁתָּ֣ אֹתָ֔ם וְהָי֖וּ קֹ֣דֶשׁ קָֽדָשִׁ֑ים כָּל־הַנֹּגֵ֥עַ בָּהֶ֖ם יִקְדָּֽשׁ׃

30 ‏וְאֶת־אַהֲרֹ֥ן וְאֶת־בָּנָ֖יו תִּמְשָׁ֑ח וְקִדַּשְׁתָּ֥ אֹתָ֖ם לְכַהֵ֥ן לִֽי׃

31 ‏וְאֶל־בְּנֵ֥י יִשְׂרָאֵ֖ל תְּדַבֵּ֣ר לֵאמֹ֑ר שֶׁ֠מֶן מִשְׁחַת־קֹ֨דֶשׁ יִהְיֶ֥ה זֶ֛ה לִ֖י לְדֹרֹתֵיכֶֽם׃

32 ‏עַל־בְּשַׂ֤ר אָדָם֙ לֹ֣א יִיסָ֔ךְ וּבְמַ֨תְכֻּנְתּ֔וֹ לֹ֥א תַעֲשׂ֖וּ כָּמֹ֑הוּ קֹ֣דֶשׁ ה֔וּא קֹ֖דֶשׁ יִהְיֶ֥ה לָכֶֽם׃

33 ‏אִ֚ישׁ אֲשֶׁ֣ר יִרְקַ֣ח כָּמֹ֔הוּ וַאֲשֶׁ֥ר יִתֵּ֛ן מִמֶּ֖נּוּ עַל־זָ֑ר וְנִכְרַ֖ת מֵעַמָּֽיו׃ ס

34 ‏וַיֹּאמֶר֩ יְהוָ֨ה אֶל־מֹשֶׁ֜ה קַח־לְךָ֣ סַמִּ֗ים נָטָ֤ף׀ וּשְׁחֵ֙לֶת֙ וְחֶלְבְּנָ֔ה סַמִּ֖ים וּלְבֹנָ֣ה זַכָּ֑ה בַּ֥ד בְּבַ֖ד יִהְיֶֽה׃

35 ‏וְעָשִׂ֤יתָ אֹתָהּ֙ קְטֹ֔רֶת רֹ֖קַח מַעֲשֵׂ֣ה רוֹקֵ֑חַ מְמֻלָּ֖ח טָה֥וֹר קֹֽדֶשׁ׃

36 ‏וְשָֽׁחַקְתָּ֣ מִמֶּנָּה֮ הָדֵק֒ וְנָתַתָּ֨ה מִמֶּ֜נָּה לִפְנֵ֤י הָעֵדֻת֙ בְּאֹ֣הֶל מוֹעֵ֔ד אֲשֶׁ֛ר אִוָּעֵ֥ד לְךָ֖ שָׁ֑מָּה קֹ֥דֶשׁ קָֽדָשִׁ֖ים תִּהְיֶ֥ה לָכֶֽם׃

37 ‏וְהַקְּטֹ֙רֶת֙ אֲשֶׁ֣ר תַּעֲשֶׂ֔ה בְּמַ֨תְכֻּנְתָּ֔הּ לֹ֥א תַעֲשׂ֖וּ לָכֶ֑ם קֹ֛דֶשׁ תִּהְיֶ֥ה לְךָ֖ לַיהוָֽה׃

38 ‏אִ֛ישׁ אֲשֶׁר־יַעֲשֶׂ֥ה כָמ֖וֹהָ לְהָרִ֣יחַ בָּ֑הּ וְנִכְרַ֖ת מֵעַמָּֽיו׃ ס

1 wə‘āśîṯā mizəbēḥa miqəṭar qəṭōreṯ ‘ăṣê šiṭṭîm ta‘ăśeh ’ōṯwō:

2 ’ammâ ’ārəkwō wə’ammâ rāḥəbwō rāḇû‘a yihəyeh wə’ammāṯayim qōmāṯwō mimmennû qarənōṯāyw:

3 wəṣipîṯā ’ōṯwō zâāḇ ṭâwōr ’eṯ-gagwō wə’eṯ-qîrōṯāyw sāḇîḇ wə’eṯ-qarənōṯāyw wə‘āśîṯā llwō zēr zâāḇ sāḇîḇ:

4 ûšətê ṭabə‘ōṯ zâāḇ ta‘ăśeh-llwō| mitaḥaṯ ləzērwō ‘al šətê ṣalə‘ōṯāyw ta‘ăśeh ‘al-šənê ṣidāyw wəhāyâ ləḇātîm ləḇadîm lāśē’ṯ ’ōṯwō bâēmmâ:

5 wə‘āśîṯā ’eṯ-habadîm ‘ăṣê šiṭṭîm wəṣipîṯā ’ōṯām zâāḇ:

6 wənāṯatâ ’ōṯwō lifənê hapārōḵeṯ ’ăšer ‘al-’ărōn hā‘ēḏuṯ lifənê hakapōreṯ ’ăšer ‘al-hā‘ēḏuṯ ’ăšer ’iûā‘ēḏ ləḵā šāmmâ:

7 wəhiqəṭîr ‘ālāyw ’ahărōn qəṭōreṯ sammîm babōqer babōqer bəhêṭîḇwō ’eṯ-hannērōṯ yaqəṭîrennâ:

8 ûḇəha‘ălōṯ ’ahărōn ’eṯ-hannērōṯ bên hā‘ărəbayim yaqəṭîrennâ qəṭōreṯ tāmîḏ lifənê yəhwâ ləḏōrōṯêḵem:

9 lō’-ṯa‘ălû ‘ālāyw qəṭōreṯ zārâ wə‘ōlâ ûminəḥâ wənēseḵə lō’ ṯissəḵû ‘ālāyw:

10 wəḵiper ’ahărōn ‘al-qarənōṯāyw ’aḥaṯ baššānâ midam ḥaṭṭa’ṯ hakipurîm ’aḥaṯ baššānâ yəḵapēr ‘ālāyw ləḏōrōṯêḵem qōḏeš-qāḏāšîm hû’ layhwâ: f

11 wayəḏabēr yəhwâ ’el-mōšeh llē’mōr:

12 kî ṯiśśā’ ’eṯ-rō’š bənê-yiśərā’ēl3 lifəquḏêhem wənāṯənû ’îš kōfer nafəšwō layhwâ bifəqōḏ ’ōṯām wəlō’-yihəyeh ḇâem neḡef bifəqōḏ ’ōṯām:

13 zeh| yitənû kāl-hā‘ōḇēr ‘al-hapəquḏîm maḥăṣîṯ haššeqel bəšeqel haqqōḏeš ‘eśərîm gērâ haššeqel maḥăṣîṯ haššeqel tərûmâ layhwâ:

14 kōl hā‘ōḇēr ‘al-hapəquḏîm miben ‘eśərîm šānâ wāmā‘əlâ yitēn tərûmaṯ yəhwâ:

15 he‘āšîr lō’-yarəbeh wəhadal lō’ yamə‘îṭ mimmaḥăṣîṯ haššāqel lāṯēṯ ’eṯ-tərûmaṯ yəhwâ ləḵapēr ‘al-nafəšōṯêḵem:

16 wəlāqaḥətā ’eṯ-kesef hakipurîm mē’ēṯ bənê yiśərā’ēl wənāṯatā ’ōṯwō ‘al-‘ăḇōḏaṯ ’ōhel mwō‘ēḏ wəhāyâ liḇənê yiśərā’ēl ləzikārwōn lifənê yəhwâ ləḵapēr ‘al-nafəšōṯêḵem: f

17 wayəḏabēr yəhwâ ’el-mōšeh llē’mōr:

18 wə‘āśîṯā kîywōr nəḥōšeṯ wəḵannwō nəḥōšeṯ lərāḥəṣâ wənāṯatā ’ōṯwō bên-’ōhel mwō‘ēḏ ûḇên hammizəbēḥa wənāṯatā šāmmâ māyim:

19 wərāḥăṣû ’ahărōn ûḇānāyw mimmennû ’eṯ-yəḏêhem wə’eṯ-raḡəlêhem:

20 bəḇō’ām ’el-’ōhel mwō‘ēḏ yirəḥăṣû-mayim wəlō’ yāmuṯû ’wō ḇəḡišətām ’el-hammizəbēḥa ləšārēṯ ləhaqəṭîr ’iššeh layhwâ:

21 wərāḥăṣû yəḏêhem wəraḡəlêhem wəlō’ yāmuṯû wəhāyəṯâ lâem ḥāq-‘wōlām lwō ûləzarə‘wō ləḏōrōṯām: f

22 wayəḏabēr yəhwâ ’el-mōšeh llē’mōr:

23 wə’atâ qaḥ-ləḵā bəśāmîm rō’š mār-dərwōr ḥămēš mē’wōṯ wəqinnəmān-beśem maḥăṣîṯwō ḥămiššîm ûmā’ṯāyim ûqənēh-ḇōśem ḥămiššîm ûmā’ṯāyim:

24 wəqidâ ḥămēš mē’wōṯ bəšeqel haqqōḏeš wəšemen zayiṯ hîn:

25 wə‘āśîṯā ’ōṯwō šemen mišəḥaṯ-qōḏeš rōqaḥ mirəqaḥaṯ ma‘ăśēh rōqēḥa šemen mišəḥaṯ-qōḏeš yihəyeh:

26 ûmāšaḥətā ḇwō ’eṯ-’ōhel mwō‘ēḏ wə’ēṯ ’ărwōn hā‘ēḏuṯ:

27 wə’eṯ-haššuləḥān wə’eṯ-kāl-kēlāyw wə’eṯ-hammənōrâ wə’eṯ-kēleyhā wə’ēṯ mizəbaḥ haqqəṭōreṯ:

28 wə’eṯ-mizəbaḥ hā‘ōlâ wə’eṯ-kāl-kēlāyw wə’eṯ-hakîyōr wə’eṯ-kannwō:

29 wəqidašətā ’ōṯām wəhāyû qōḏeš qāḏāšîm kāl-hannōḡē‘a bâem yiqədāš:

30 wə’eṯ-’ahărōn wə’eṯ-bānāyw timəšāḥ wəqidašətā ’ōṯām ləḵahēn lî:

31 wə’el-bənê yiśərā’ēl təḏabēr lē’mōr šemen mišəḥaṯ-qōḏeš yihəyeh zeh lî ləḏōrōṯêḵem:

32 ‘al-bəśar ’āḏām lō’ yîsāḵə ûḇəmaṯəkunətwō lō’ ṯa‘ăśû kāmōhû qōḏeš hû’ qōḏeš yihəyeh lāḵem:

33 ’îš ’ăšer yirəqaḥ kāmōhû wa’ăšer yitēn mimmennû ‘al-zār wəniḵəraṯ mē‘ammāyw: s

34 wayyō’mer yəhwâ ’el-mōšeh qaḥ-ləḵā sammîm nāṭāf| ûšəḥēleṯ wəḥeləbənâ sammîm ûləḇōnâ zakâ baḏ bəḇaḏ yihəyeh:

35 wə‘āśîṯā ’ōṯāh qəṭōreṯ rōqaḥ ma‘ăśēh rwōqēḥa məmullāḥ ṭâwōr qōḏeš:

36 wəšāḥaqətā mimmennâ hāḏēq wənāṯatâ mimmennâ lifənê hā‘ēḏuṯ bə’ōhel mwō‘ēḏ ’ăšer ’iûā‘ēḏ ləḵā šāmmâ qōḏeš qāḏāšîm tihəyeh lāḵem:

37 wəhaqqəṭōreṯ ’ăšer ta‘ăśeh bəmaṯəkunətāh lō’ ṯa‘ăśû lāḵem qōḏeš tihəyeh ləḵā layhwâ:

38 ’îš ’ăšer-ya‘ăśeh ḵāmwōhā ləhārîḥa bāh wəniḵəraṯ mē‘ammāyw: s


Next: Exodus (Shemot) Chapter 31