Sacred Texts  Bible  Index 
Polyglot  KJV  Sep  Vul 

Exodus (Shemot) Index
  Previous  Next 

Tanach (Hebrew): Exodus (Shemot) Chapter 9

1 ‏וַיֹּ֤אמֶר יְהוָה֙ אֶל־מֹשֶׁ֔ה בֹּ֖א אֶל־פַּרְעֹ֑ה וְדִבַּרְתָּ֣ אֵלָ֗יו כֹּֽה־אָמַ֤ר יְהוָה֙ אֱלֹהֵ֣י הָֽעִבְרִ֔ים שַׁלַּ֥ח אֶת־עַמִּ֖י וְיַֽעַבְדֻֽנִי׃

2 ‏כִּ֛י אִם־מָאֵ֥ן אַתָּ֖ה לְשַׁלֵּ֑חַ וְעוֹדְךָ֖ מַחֲזִ֥יק בָּֽם׃

3 ‏הִנֵּ֨ה יַד־יְהוָ֜ה הוֹיָ֗ה בְּמִקְנְךָ֙ אֲשֶׁ֣ר בַּשָּׂדֶ֔ה בַּסּוּסִ֤ים בַּֽחֲמֹרִים֙ בַּגְּמַלִּ֔ים בַּבָּקָ֖ר וּבַצֹּ֑אן דֶּ֖בֶר כָּבֵ֥ד מְאֹֽד׃

4 ‏וְהִפְלָ֣ה יְהוָ֔ה בֵּ֚ין מִקְנֵ֣ה יִשְׂרָאֵ֔ל וּבֵ֖ין מִקְנֵ֣ה מִצְרָ֑יִם וְלֹ֥א יָמ֛וּת מִכָּל־לִבְנֵ֥י יִשְׂרָאֵ֖ל דָּבָֽר׃

5 ‏וַיָּ֥שֶׂם יְהוָ֖ה מוֹעֵ֣ד לֵאמֹ֑ר מָחָ֗ר יַעֲשֶׂ֧ה יְהוָ֛ה הַדָּבָ֥ר הַזֶּ֖ה בָּאָֽרֶץ׃

6 ‏וַיַּ֨עַשׂ יְהוָ֜ה אֶת־הַדָּבָ֤ר הַזֶּה֙ מִֽמָּחֳרָ֔ת וַיָּ֕מָת כֹּ֖ל מִקְנֵ֣ה מִצְרָ֑יִם וּמִמִּקְנֵ֥ה בְנֵֽי־יִשְׂרָאֵ֖ל לֹא־מֵ֥ת אֶחָֽד׃

7 ‏וַיִּשְׁלַ֣ח פַּרְעֹ֔ה וְהִנֵּ֗ה לֹא־מֵ֛ת מִמִּקְנֵ֥ה יִשְׂרָאֵ֖ל עַד־אֶחָ֑ד וַיִּכְבַּד֙ לֵ֣ב פַּרְעֹ֔ה וְלֹ֥א שִׁלַּ֖ח אֶת־הָעָֽם׃ פ

8 ‏וַיֹּ֣אמֶר יְהוָה֮ אֶל־מֹשֶׁ֣ה וְאֶֽל־אַהֲרֹן֒ קְח֤וּ לָכֶם֙ מְלֹ֣א חָפְנֵיכֶ֔ם פִּ֖יחַ כִּבְשָׁ֑ן וּזְרָק֥וֹ מֹשֶׁ֛ה הַשָּׁמַ֖יְמָה לְעֵינֵ֥י פַרְעֹֽה׃

9 ‏וְהָיָ֣ה לְאָבָ֔ק עַ֖ל כָּל־אֶ֣רֶץ מִצְרָ֑יִם וְהָיָ֨ה עַל־הָאָדָ֜ם וְעַל־הַבְּהֵמָ֗ה לִשְׁחִ֥ין פֹּרֵ֛חַ אֲבַעְבֻּעֹ֖ת בְּכָל־אֶ֥רֶץ מִצְרָֽיִם׃

10 ‏וַיִּקְח֞וּ אֶת־פִּ֣יחַ הַכִּבְשָׁ֗ן וַיַּֽעַמְדוּ֙ לִפְנֵ֣י פַרְעֹ֔ה וַיִּזְרֹ֥ק אֹת֛וֹ מֹשֶׁ֖ה הַשָּׁמָ֑יְמָה וַיְהִ֗י שְׁחִין֙ אֲבַעְבֻּעֹ֔ת פֹּרֵ֕חַ בָּאָדָ֖ם וּבַבְּהֵמָֽה׃

11 ‏וְלֹֽא־יָכְל֣וּ הַֽחַרְטֻמִּ֗ים לַעֲמֹ֛ד לִפְנֵ֥י מֹשֶׁ֖ה מִפְּנֵ֣י הַשְּׁחִ֑ין כִּֽי־הָיָ֣ה הַשְּׁחִ֔ין בַּֽחֲרְטֻמִּ֖ם וּבְכָל־מִצְרָֽיִם׃

12 ‏וַיְחַזֵּ֤ק יְהוָה֙ אֶת־לֵ֣ב פַּרְעֹ֔ה וְלֹ֥א שָׁמַ֖ע אֲלֵהֶ֑ם כַּאֲשֶׁ֛ר דִּבֶּ֥ר יְהוָ֖ה אֶל־מֹשֶֽׁה׃ ס

13 ‏וַיֹּ֤אמֶר יְהוָה֙ אֶל־מֹשֶׁ֔ה הַשְׁכֵּ֣ם בַּבֹּ֔קֶר וְהִתְיַצֵּ֖ב לִפְנֵ֣י פַרְעֹ֑ה וְאָמַרְתָּ֣ אֵלָ֗יו כֹּֽה־אָמַ֤ר יְהוָה֙ אֱלֹהֵ֣י הָֽעִבְרִ֔ים שַׁלַּ֥ח אֶת־עַמִּ֖י וְיַֽעַבְדֻֽנִי׃

14 ‏כִּ֣י׀ בַּפַּ֣עַם הַזֹּ֗את אֲנִ֨י שֹׁלֵ֜חַ אֶת־כָּל־מַגֵּפֹתַי֙ אֶֽל־לִבְּךָ֔ וּבַעֲבָדֶ֖יךָ וּבְעַמֶּ֑ךָ בַּעֲב֣וּר תֵּדַ֔ע כִּ֛י אֵ֥ין כָּמֹ֖נִי בְּכָל־הָאָֽרֶץ׃

15 ‏כִּ֤י עַתָּה֙ שָׁלַ֣חְתִּי אֶת־יָדִ֔י וָאַ֥ךְ אוֹתְךָ֛ וְאֶֽת־עַמְּךָ֖ בַּדָּ֑בֶר וַתִּכָּחֵ֖ד מִן־הָאָֽרֶץ׃

16 ‏וְאוּלָ֗ם בַּעֲב֥וּר זֹאת֙ הֶעֱמַדְתִּ֔יךָ בַּעֲב֖וּר הַרְאֹתְךָ֣ אֶת־כֹּחִ֑י וּלְמַ֛עַן סַפֵּ֥ר שְׁמִ֖י בְּכָל־הָאָֽרֶץ׃

17 ‏עוֹדְךָ֖ מִסְתּוֹלֵ֣ל בְּעַמִּ֑י לְבִלְתִּ֖י שַׁלְּחָֽם׃

18 ‏הִנְנִ֤י מַמְטִיר֙ כָּעֵ֣ת מָחָ֔ר בָּרָ֖ד כָּבֵ֣ד מְאֹ֑ד אֲשֶׁ֨ר לֹא־הָיָ֤ה כָמֹ֙הוּ֙ בְּמִצְרַ֔יִם לְמִן־הַיּ֥וֹם הִוָּסְדָ֖ה וְעַד־עָֽתָּה׃

19 ‏וְעַתָּ֗ה שְׁלַ֤ח הָעֵז֙ אֶֽת־מִקְנְךָ֔ וְאֵ֛ת כָּל־אֲשֶׁ֥ר לְךָ֖ בַּשָּׂדֶ֑ה כָּל־הָאָדָ֨ם וְהַבְּהֵמָ֜ה אֲשֶֽׁר־יִמָּצֵ֣א בַשָּׂדֶ֗ה וְלֹ֤א יֵֽאָסֵף֙ הַבַּ֔יְתָה וְיָרַ֧ד עֲלֵהֶ֛ם הַבָּרָ֖ד וָמֵֽתוּ׃

20 ‏הַיָּרֵא֙ אֶת־דְּבַ֣ר יְהוָ֔ה מֵֽעַבְדֵ֖י פַּרְעֹ֑ה הֵנִ֛יס אֶת־עֲבָדָ֥יו וְאֶת־מִקְנֵ֖הוּ אֶל־הַבָּתִּֽים׃

21 ‏וַאֲשֶׁ֥ר לֹא־שָׂ֛ם לִבּ֖וֹ אֶל־דְּבַ֣ר יְהוָ֑ה וַֽיַּעֲזֹ֛ב אֶת־עֲבָדָ֥יו וְאֶת־מִקְנֵ֖הוּ בַּשָּׂדֶֽה׃ פ

22 ‏וַיֹּ֨אמֶר יְהוָ֜ה אֶל־מֹשֶׁה נְטֵ֤ה אֶת־יָֽדְךָ֙ עַל־הַשָּׁמַ֔יִם וִיהִ֥י בָרָ֖ד בְּכָל־אֶ֣רֶץ מִצְרָ֑יִם עַל־הָאָדָ֣ם וְעַל־הַבְּהֵמָ֗ה וְעַ֛ל כָּל־עֵ֥שֶׂב הַשָּׂדֶ֖ה בְּאֶ֥רֶץ מִצְרָֽיִם׃

23 ‏וַיֵּ֨ט מֹשֶׁ֣ה אֶת־מַטֵּהוּ֮ עַל־הַשָּׁמַיִם֒ וַֽיהוָ֗ה נָתַ֤ן קֹלֹת֙ וּבָרָ֔ד וַתִּ֥הֲלַךְ אֵ֖שׁ אָ֑רְצָה וַיַּמְטֵ֧ר יְהוָ֛ה בָּרָ֖ד עַל־אֶ֥רֶץ מִצְרָֽיִם׃

24 ‏וַיְהִ֣י בָרָ֔ד וְאֵ֕שׁ מִתְלַקַּ֖חַת בְּת֣וֹךְ הַבָּרָ֑ד כָּבֵ֣ד מְאֹ֔ד אֲ֠שֶׁר לֹֽא־הָיָ֤ה כָמֹ֙הוּ֙ בְּכָל־אֶ֣רֶץ מִצְרַ֔יִם מֵאָ֖ז הָיְתָ֥ה לְגֽוֹי׃

25 ‏וַיַּ֨ךְ הַבָּרָ֜ד בְּכָל־אֶ֣רֶץ מִצְרַ֗יִם אֵ֚ת כָּל־אֲשֶׁ֣ר בַּשָּׂדֶ֔ה מֵאָדָ֖ם וְעַד־בְּהֵמָ֑ה וְאֵ֨ת כָּל־עֵ֤שֶׂב הַשָּׂדֶה֙ הִכָּ֣ה הַבָּרָ֔ד וְאֶת־כָּל־עֵ֥ץ הַשָּׂדֶ֖ה שִׁבֵּֽר׃

26 ‏רַ֚ק בְּאֶ֣רֶץ גֹּ֔שֶׁן אֲשֶׁר־שָׁ֖ם בְּנֵ֣י יִשְׂרָאֵ֑ל לֹ֥א הָיָ֖ה בָּרָֽד׃

27 ‏וַיִּשְׁלַ֣ח פַּרְעֹ֗ה וַיִּקְרָא֙ לְמֹשֶׁ֣ה וּֽלְאַהֲרֹ֔ן וַיֹּ֥אמֶר אֲלֵהֶ֖ם חָטָ֣אתִי הַפָּ֑עַם יְהוָה֙ הַצַּדִּ֔יק וַאֲנִ֥י וְעַמִּ֖י הָרְשָׁעִֽים׃

28 ‏הַעְתִּ֙ירוּ֙ אֶל־יְהוָ֔ה וְרַ֕ב מִֽהְיֹ֛ת קֹלֹ֥ת אֱלֹהִ֖ים וּבָרָ֑ד וַאֲשַׁלְּחָ֣ה אֶתְכֶ֔ם וְלֹ֥א תֹסִפ֖וּן לַעֲמֹֽד׃

29 ‏וַיֹּ֤אמֶר אֵלָיו֙ מֹשֶׁ֔ה כְּצֵאתִי֙ אֶת־הָעִ֔יר אֶפְרֹ֥שׂ אֶת־כַּפַּ֖י אֶל־יְהוָ֑ה הַקֹּל֣וֹת יֶחְדָּל֗וּן וְהַבָּרָד֙ לֹ֣א יִֽהְיֶה־ע֔וֹד לְמַ֣עַן תֵּדַ֔ע כִּ֥י לַיהוָ֖ה הָאָֽרֶץ׃

30 ‏וְאַתָּ֖ה וַעֲבָדֶ֑יךָ יָדַ֕עְתִּי כִּ֚י טֶ֣רֶם תִּֽירְא֔וּן מִפְּנֵ֖י יְהוָ֥ה אֱלֹהִֽים׃

31 ‏וְהַפִּשְׁתָּ֥ה וְהַשְּׂעֹרָ֖ה נֻכָּ֑תָה כִּ֤י הַשְּׂעֹרָה֙ אָבִ֔יב וְהַפִּשְׁתָּ֖ה גִּבְעֹֽל׃

32 ‏וְהַחִטָּ֥ה וְהַכֻּסֶּ֖מֶת לֹ֣א נֻכּ֑וּ כִּ֥י אֲפִילֹ֖ת הֵֽנָּה׃

33 ‏וַיֵּצֵ֨א מֹשֶׁ֜ה מֵעִ֤ם פַּרְעֹה֙ אֶת־הָעִ֔יר וַיִּפְרֹ֥שׂ כַּפָּ֖יו אֶל־יְהוָ֑ה וַֽיַּחְדְּל֤וּ הַקֹּלוֹת֙ וְהַבָּרָ֔ד וּמָטָ֖ר לֹא־נִתַּ֥ךְ אָֽרְצָה׃

34 ‏וַיַּ֣רְא פַּרְעֹ֗ה כִּֽי־חָדַ֨ל הַמָּטָ֧ר וְהַבָּרָ֛ד וְהַקֹּלֹ֖ת וַיֹּ֣סֶף לַחֲטֹ֑א וַיַּכְבֵּ֥ד לִבּ֖וֹ ה֥וּא וַעֲבָדָֽיו׃

35 ‏וַֽיֶּחֱזַק֙ לֵ֣ב פַּרְעֹ֔ה וְלֹ֥א שִׁלַּ֖ח אֶת־בְּנֵ֣י יִשְׂרָאֵ֑ל כַּאֲשֶׁ֛ר דִּבֶּ֥ר יְהוָ֖ה בְּיַד־מֹשֶֽׁה׃ פ

1 wayyō’mer yəhwâ ’el-mōšeh bō’ ’el-parə‘ōh wəḏibarətā ’ēlāyw kōh-’āmar yəhwâ ’ĕlōhê hā‘iḇərîm šallaḥ ’eṯ-‘ammî wəya‘aḇəḏunî:

2 kî ’im-mā’ēn ’atâ ləšallēḥa wə‘wōḏəḵā maḥăzîq bām:

3 hinnēh yaḏ-yəhwâ hwōyâ bəmiqənəḵā ’ăšer baśśāḏeh bassûsîm baḥămōrîm bagəmallîm babāqār ûḇaṣṣō’n deḇer kāḇēḏ mə’ōḏ:

4 wəhifəlâ yəhwâ bên miqənēh yiśərā’ēl ûḇên miqənēh miṣərāyim wəlō’ yāmûṯ mikāl-liḇənê yiśərā’ēl dāḇār:

5 wayyāśem yəhwâ mwō‘ēḏ lē’mōr māḥār ya‘ăśeh yəhwâ hadāḇār hazzeh bā’āreṣ:

6 wayya‘aś yəhwâ ’eṯ-hadāḇār hazzeh mimmāḥŏrāṯ wayyāmāṯ kōl miqənēh miṣərāyim ûmimmiqənēh ḇənê-yiśərā’ēl lō’-mēṯ ’eḥāḏ:

7 wayyišəlaḥ parə‘ōh wəhinnēh lō’-mēṯ mimmiqənēh yiśərā’ēl ‘aḏ-’eḥāḏ wayyiḵəbaḏ lēḇ parə‘ōh wəlō’ šillaḥ ’eṯ-hā‘ām: f

8 wayyō’mer yəhwâ ’el-mōšeh wə’el-’ahărōn qəḥû lāḵem məlō’ ḥāfənêḵem pîḥa kiḇəšān ûzərāqwō mōšeh haššāmayəmâ lə‘ênê farə‘ōh:

9 wəhāyâ lə’āḇāq ‘al kāl-’ereṣ miṣərāyim wəhāyâ ‘al-hā’āḏām wə‘al-habəhēmâ lišəḥîn pōrēḥa ’ăḇa‘əbu‘ōṯ bəḵāl-’ereṣ miṣərāyim:

10 wayyiqəḥû ’eṯ-pîḥa hakiḇəšān wayya‘aməḏû lifənê farə‘ōh wayyizərōq ’ōṯwō mōšeh haššāmāyəmâ wayəhî šəḥîn ’ăḇa‘əbu‘ōṯ pōrēḥa bā’āḏām ûḇabəhēmâ:

11 wəlō’-yāḵəlû haḥarəṭummîm la‘ămōḏ lifənê mōšeh mipənê haššəḥîn kî-hāyâ haššəḥîn baḥărəṭummim ûḇəḵāl-miṣərāyim:

12 wayəḥazzēq yəhwâ ’eṯ-lēḇ parə‘ōh wəlō’ šāma‘ ’ălēhem ka’ăšer diber yəhwâ ’el-mōšeh: s

13 wayyō’mer yəhwâ ’el-mōšeh hašəkēm babōqer wəhiṯəyaṣṣēḇ lifənê farə‘ōh wə’āmarətā ’ēlāyw kōh-’āmar yəhwâ ’ĕlōhê hā‘iḇərîm šallaḥ ’eṯ-‘ammî wəya‘aḇəḏunî:

14 kî| bapa‘am hazzō’ṯ ’ănî šōlēḥa ’eṯ-kāl-magēfōṯay ’el-libəḵā ûḇa‘ăḇāḏeyḵā ûḇə‘ammeḵā ba‘ăḇûr tēḏa‘ kî ’ên kāmōnî bəḵāl-hā’āreṣ:

15 kî ‘atâ šālaḥətî ’eṯ-yāḏî wā’aḵə ’wōṯəḵā wə’eṯ-‘amməḵā badāḇer watikāḥēḏ min-hā’āreṣ:

16 wə’ûlām ba‘ăḇûr zō’ṯ he‘ĕmaḏətîḵā ba‘ăḇûr harə’ōṯəḵā ’eṯ-kōḥî ûləma‘an sapēr šəmî bəḵāl-hā’āreṣ:

17 ‘wōḏəḵā misətwōlēl bə‘ammî ləḇilətî šalləḥām:

18 hinənî maməṭîr kā‘ēṯ māḥār bārāḏ kāḇēḏ mə’ōḏ ’ăšer lō’-hāyâ ḵāmōhû bəmiṣərayim ləmin-hayywōm hiûāsəḏâ wə‘aḏ-‘ātâ:

19 wə‘atâ šəlaḥ hā‘ēz ’eṯ-miqənəḵā wə’ēṯ kāl-’ăšer ləḵā baśśāḏeh kāl-hā’āḏām wəhabəhēmâ ’ăšer-yimmāṣē’ ḇaśśāḏeh wəlō’ yē’āsēf habayəṯâ wəyāraḏ ‘ălēhem habārāḏ wāmēṯû:

20 hayyārē’ ’eṯ-dəḇar yəhwâ mē‘aḇəḏê parə‘ōh hēnîs ’eṯ-‘ăḇāḏāyw wə’eṯ-miqənēhû ’el-habātîm:

21 wa’ăšer lō’-śām libwō ’el-dəḇar yəhwâ wayya‘ăzōḇ ’eṯ-‘ăḇāḏāyw wə’eṯ-miqənēhû baśśāḏeh: f

22 wayyō’mer yəhwâ ’el-mōšeh nəṭēh ’eṯ-yāḏəḵā ‘al-haššāmayim wîhî ḇārāḏ bəḵāl-’ereṣ miṣərāyim ‘al-hā’āḏām wə‘al-habəhēmâ wə‘al kāl-‘ēśeḇ haśśāḏeh bə’ereṣ miṣərāyim:

23 wayyēṭ mōšeh ’eṯ-maṭṭēhû ‘al-haššāmayim wayhwâ nāṯan qōlōṯ ûḇārāḏ watihălaḵə ’ēš ’ārəṣâ wayyaməṭēr yəhwâ bārāḏ ‘al-’ereṣ miṣərāyim:

24 wayəhî ḇārāḏ wə’ēš miṯəlaqqaḥaṯ bəṯwōḵə habārāḏ kāḇēḏ mə’ōḏ ’ăšer lō’-hāyâ ḵāmōhû bəḵāl-’ereṣ miṣərayim mē’āz hāyəṯâ ləḡwōy:

25 wayyaḵə habārāḏ bəḵāl-’ereṣ miṣərayim ’ēṯ kāl-’ăšer baśśāḏeh mē’āḏām wə‘aḏ-bəhēmâ wə’ēṯ kāl-‘ēśeḇ haśśāḏeh hikâ habārāḏ wə’eṯ-kāl-‘ēṣ haśśāḏeh šibēr:

26 raq bə’ereṣ gōšen ’ăšer-šām bənê yiśərā’ēl lō’ hāyâ bārāḏ:

27 wayyišəlaḥ parə‘ōh wayyiqərā’ ləmōšeh ûlə’ahărōn wayyō’mer ’ălēhem ḥāṭā’ṯî hapā‘am yəhwâ haṣṣadîq wa’ănî wə‘ammî hārəšā‘îm:

28 ha‘ətîrû ’el-yəhwâ wəraḇ mihəyōṯ qōlōṯ ’ĕlōhîm ûḇārāḏ wa’ăšalləḥâ ’eṯəḵem wəlō’ ṯōsifûn la‘ămōḏ:

29 wayyō’mer ’ēlāyw mōšeh kəṣē’ṯî ’eṯ-hā‘îr ’efərōś ’eṯ-kapay ’el-yəhwâ haqqōlwōṯ yeḥədālûn wəhabārāḏ lō’ yihəyeh-‘wōḏ ləma‘an tēḏa‘ kî layhwâ hā’āreṣ:

30 wə’atâ wa‘ăḇāḏeyḵā yāḏa‘ətî kî ṭerem tîrə’ûn mipənê yəhwâ ’ĕlōhîm:

31 wəhapišətâ wəhaśśə‘ōrâ nukāṯâ kî haśśə‘ōrâ ’āḇîḇ wəhapišətâ giḇə‘ōl:

32 wəhaḥiṭṭâ wəhakussemeṯ lō’ nukû kî ’ăfîlōṯ hēnnâ:

33 wayyēṣē’ mōšeh mē‘im parə‘ōh ’eṯ-hā‘îr wayyifərōś kapāyw ’el-yəhwâ wayyaḥədəlû haqqōlwōṯ wəhabārāḏ ûmāṭār lō’-nitaḵə ’ārəṣâ:

34 wayyarə’ parə‘ōh kî-ḥāḏal hammāṭār wəhabārāḏ wəhaqqōlōṯ wayyōsef laḥăṭō’ wayyaḵəbēḏ libwō hû’ wa‘ăḇāḏāyw:

35 wayyeḥĕzaq lēḇ parə‘ōh wəlō’ šillaḥ ’eṯ-bənê yiśərā’ēl ka’ăšer diber yəhwâ bəyaḏ-mōšeh: f


Next: Exodus (Shemot) Chapter 10