Sacred Texts  Bible  Index 
Polyglot  KJV  Sep  Vul 

Ecclesiastes (Qohelet) Index
  Previous  Next 

Tanach (Hebrew): Ecclesiastes (Qohelet) Chapter 6

1 ‏יֵ֣שׁ רָעָ֔ה אֲשֶׁ֥ר רָאִ֖יתִי תַּ֣חַת הַשָּׁ֑מֶשׁ וְרַבָּ֥ה הִ֖יא עַל־הָאָדָֽם׃

2 ‏אִ֣ישׁ אֲשֶׁ֣ר יִתֶּן־ל֣וֹ הָאֱלֹהִ֡ים עֹשֶׁר֩ וּנְכָסִ֨ים וְכָב֜וֹד וְֽאֵינֶ֨נּוּ חָסֵ֥ר לְנַפְשׁ֣וֹ׀ מִכֹּ֣ל אֲשֶׁר־יִתְאַוֶּ֗ה וְלֹֽא־יַשְׁלִיטֶ֤נּוּ הָֽאֱלֹהִים֙ לֶאֱכֹ֣ל מִמֶּ֔נּוּ כִּ֛י אִ֥ישׁ נָכְרִ֖י יֹֽאכֲלֶ֑נּוּ זֶ֥ה הֶ֛בֶל וָחֳלִ֥י רָ֖ע הֽוּא׃

3 ‏אִם־יוֹלִ֣יד אִ֣ישׁ מֵאָ֡ה וְשָׁנִים֩ רַבּ֨וֹת יִֽחְיֶ֜ה וְרַ֣ב׀ שֶׁיִּהְי֣וּ יְמֵֽי־שָׁנָ֗יו וְנַפְשׁוֹ֙ לֹא־תִשְׂבַּ֣ע מִן־הַטּוֹבָ֔ה וְגַם־קְבוּרָ֖ה לֹא־הָ֣יְתָה לּ֑וֹ אָמַ֕רְתִּי ט֥וֹב מִמֶּ֖נּוּ הַנָּֽפֶל׃

4 ‏כִּֽי־בַהֶ֥בֶל בָּ֖א וּבַחֹ֣שֶׁךְ יֵלֵ֑ךְ וּבַחֹ֖שֶׁךְ שְׁמ֥וֹ יְכֻסֶּֽה׃

5 ‏גַּם־שֶׁ֥מֶשׁ לֹא־רָאָ֖ה וְלֹ֣א יָדָ֑ע נַ֥חַת לָזֶ֖ה מִזֶּֽה׃

6 ‏וְאִלּ֣וּ חָיָ֗ה אֶ֤לֶף שָׁנִים֙ פַּעֲמַ֔יִם וְטוֹבָ֖ה לֹ֣א רָאָ֑ה הֲלֹ֛א אֶל־מָק֥וֹם אֶחָ֖ד הַכֹּ֥ל הוֹלֵֽךְ׃

7 ‏כָּל־עֲמַ֥ל הָאָדָ֖ם לְפִ֑יהוּ וְגַם־הַנֶּ֖פֶשׁ לֹ֥א תִמָּלֵֽא׃

8 ‏כִּ֛י מַה־יּוֹתֵ֥ר לֶחָכָ֖ם מִֽן־הַכְּסִ֑יל מַה־לֶּעָנִ֣י יוֹדֵ֔עַ לַהֲלֹ֖ךְ נֶ֥גֶד הַחַיִּֽים׃

9 ‏ט֛וֹב מַרְאֵ֥ה עֵינַ֖יִם מֵֽהֲלָךְ־נָ֑פֶשׁ גַּם־זֶ֥ה הֶ֖בֶל וּרְע֥וּת רֽוּחַ׃

10 ‏מַה־שֶּֽׁהָיָ֗ה כְּבָר֙ נִקְרָ֣א שְׁמ֔וֹ וְנוֹדָ֖ע אֲשֶׁר־ה֣וּא אָדָ֑ם וְלֹא־יוּכַ֣ל לָדִ֔ין עִ֥ם שהתקיף שֶׁתַּקִּ֖יף מִמֶּֽנּוּ׃

11 ‏כִּ֛י יֵשׁ־דְּבָרִ֥ים הַרְבֵּ֖ה מַרְבִּ֣ים הָ֑בֶל מַה־יֹּתֵ֖ר לָאָדָֽם׃

12 ‏כִּ֣י מִֽי־יוֹדֵעַ֩ מַה־טּ֨וֹב לָֽאָדָ֜ם בַּֽחַיִּ֗ים מִסְפַּ֛ר יְמֵי־חַיֵּ֥י הֶבְל֖וֹ וְיַעֲשֵׂ֣ם כַּצֵּ֑ל אֲשֶׁר֙ מִֽי־יַגִּ֣יד לָֽאָדָ֔ם מַה־יִּהְיֶ֥ה אַחֲרָ֖יו תַּ֥חַת הַשָּֽׁמֶשׁ׃

1 yēš rā‘â ’ăšer rā’îṯî taḥaṯ haššāmeš wərabâ hî’ ‘al-hā’āḏām:

2 ’îš ’ăšer yiten-lwō hā’ĕlōhîm ‘ōšer ûnəḵāsîm wəḵāḇwōḏ wə’ênennû ḥāsēr lənafəšwō| mikōl ’ăšer-yiṯə’aûeh wəlō’-yašəlîṭennû hā’ĕlōhîm le’ĕḵōl mimmennû kî ’îš nāḵərî yō’ḵălennû zeh heḇel wāḥŏlî rā‘ hû’:

3 ’im-ywōlîḏ ’îš mē’â wəšānîm rabwōṯ yiḥəyeh wəraḇ| šeyyihəyû yəmê-šānāyw wənafəšwō lō’-ṯiśəba‘ min-haṭṭwōḇâ wəḡam-qəḇûrâ lō’-hāyəṯâ llwō ’āmarətî ṭwōḇ mimmennû hannāfel:

4 kî-ḇaheḇel bā’ ûḇaḥōšeḵə yēlēḵə ûḇaḥōšeḵə šəmwō yəḵusseh:

5 gam-šemeš lō’-rā’â wəlō’ yāḏā‘ naḥaṯ lāzeh mizzeh:

6 wə’illû ḥāyâ ’elef šānîm pa‘ămayim wəṭwōḇâ lō’ rā’â hălō’ ’el-māqwōm ’eḥāḏ hakōl hwōlēḵə:

7 kāl-‘ămal hā’āḏām ləfîhû wəḡam-hannefeš lō’ ṯimmālē’:

8 kî mah-yywōṯēr leḥāḵām min-hakəsîl mah-lle‘ānî ywōḏē‘a lahălōḵə neḡeḏ haḥayyîm:

9 ṭwōḇ marə’ēh ‘ênayim mēhălāḵə-nāfeš gam-zeh heḇel ûrə‘ûṯ rûḥa:

10 mah-ššehāyâ kəḇār niqərā’ šəmwō wənwōḏā‘ ’ăšer-hû’ ’āḏām wəlō’-yûḵal lāḏîn ‘im šehaṯəqîf šetaqqîf mimmennû:

11 kî yēš-dəḇārîm harəbēh marəbîm hāḇel mah-yyōṯēr lā’āḏām:

12 kî mî-ywōḏē‘a mah-ṭṭwōḇ lā’āḏām baḥayyîm misəpar yəmê-ḥayyê heḇəlwō wəya‘ăśēm kaṣṣēl ’ăšer mî-yagîḏ lā’āḏām mah-yyihəyeh ’aḥărāyw taḥaṯ haššāmeš:


Next: Ecclesiastes (Qohelet) Chapter 7