Sacred Texts  Bible  Index 
Polyglot  KJV  Sep  Vul 

Ecclesiastes (Qohelet) Index
  Previous  Next 

Tanach (Hebrew): Ecclesiastes (Qohelet) Chapter 4

1 ‏וְשַׁ֣בְתִּֽי אֲנִ֗י וָאֶרְאֶה֙ אֶת־כָּל־הָ֣עֲשֻׁקִ֔ים אֲשֶׁ֥ר נַעֲשִׂ֖ים תַּ֣חַת הַשָּׁ֑מֶשׁ וְהִנֵּ֣ה׀ דִּמְעַ֣ת הָעֲשֻׁקִ֗ים וְאֵ֤ין לָהֶם֙ מְנַחֵ֔ם וּמִיַּ֤ד עֹֽשְׁקֵיהֶם֙ כֹּ֔חַ וְאֵ֥ין לָהֶ֖ם מְנַחֵֽם׃

2 ‏וְשַׁבֵּ֧חַ אֲנִ֛י אֶת־הַמֵּתִ֖ים שֶׁכְּבָ֣ר מֵ֑תוּ מִן־הַ֣חַיִּ֔ים אֲשֶׁ֛ר הֵ֥מָּה חַיִּ֖ים עֲדֶֽנָה׃

3 ‏וְטוֹב֙ מִשְּׁנֵיהֶ֔ם אֵ֥ת אֲשֶׁר־עֲדֶ֖ן לֹ֣א הָיָ֑ה אֲשֶׁ֤ר לֹֽא־רָאָה֙ אֶת־הַמַּעֲשֶׂ֣ה הָרָ֔ע אֲשֶׁ֥ר נַעֲשָׂ֖ה תַּ֥חַת הַשָּֽׁמֶשׁ׃

4 ‏וְרָאִ֨יתִֽי אֲנִ֜י אֶת־כָּל־עָמָ֗ל וְאֵת֙ כָּל־כִּשְׁר֣וֹן הַֽמַּעֲשֶׂ֔ה כִּ֛י הִ֥יא קִנְאַת־אִ֖ישׁ מֵרֵעֵ֑הוּ גַּם־זֶ֥ה הֶ֖בֶל וּרְע֥וּת רֽוּחַ׃

5 ‏הַכְּסִיל֙ חֹבֵ֣ק אֶת־יָדָ֔יו וְאֹכֵ֖ל אֶת־בְּשָׂרֽוֹ׃

6 ‏ט֕וֹב מְלֹ֥א כַ֖ף נָ֑חַת מִמְּלֹ֥א חָפְנַ֛יִם עָמָ֖ל וּרְע֥וּת רֽוּחַ׃

7 ‏וְשַׁ֧בְתִּי אֲנִ֛י וָאֶרְאֶ֥ה הֶ֖בֶל תַּ֥חַת הַשָּֽׁמֶשׁ׃

8 ‏יֵ֣שׁ אֶחָד֩ וְאֵ֨ין שֵׁנִ֜י גַּ֣ם בֵּ֧ן וָאָ֣ח אֵֽין־ל֗וֹ וְאֵ֥ין קֵץ֙ לְכָל־עֲמָל֔וֹ גַּם־עיניו עֵינ֖וֹ לֹא־תִשְׂבַּ֣ע עֹ֑שֶׁר וּלְמִ֣י׀ אֲנִ֣י עָמֵ֗ל וּמְחַסֵּ֤ר אֶת־נַפְשִׁי֙ מִטּוֹבָ֔ה גַּם־זֶ֥ה הֶ֛בֶל וְעִנְיַ֥ן רָ֖ע הֽוּא׃

9 ‏טוֹבִ֥ים הַשְּׁנַ֖יִם מִן־הָאֶחָ֑ד אֲשֶׁ֧ר יֵשׁ־לָהֶ֛ם שָׂכָ֥ר ט֖וֹב בַּעֲמָלָֽם׃

10 ‏כִּ֣י אִם־יִפֹּ֔לוּ הָאֶחָ֖ד יָקִ֣ים אֶת־חֲבֵר֑וֹ וְאִ֣יל֗וֹ הָֽאֶחָד֙ שֶׁיִּפּ֔וֹל וְאֵ֥ין שֵׁנִ֖י לַהֲקִימֽוֹ׃

11 ‏גַּ֛ם אִם־יִשְׁכְּב֥וּ שְׁנַ֖יִם וְחַ֣ם לָהֶ֑ם וּלְאֶחָ֖ד אֵ֥יךְ יֵחָֽם׃

12 ‏וְאִֽם־יִתְקְפוֹ֙ הָאֶחָ֔ד הַשְּׁנַ֖יִם יַעַמְד֣וּ נֶגְדּ֑וֹ וְהַחוּט֙ הַֽמְשֻׁלָּ֔שׁ לֹ֥א בִמְהֵרָ֖ה יִנָּתֵֽק׃

13 ‏ט֛וֹב יֶ֥לֶד מִסְכֵּ֖ן וְחָכָ֑ם מִמֶּ֤לֶךְ זָקֵן֙ וּכְסִ֔יל אֲשֶׁ֛ר לֹא־יָדַ֥ע לְהִזָּהֵ֖ר עֽוֹד׃

14 ‏כִּֽי־מִבֵּ֥ית הָסוּרִ֖ים יָצָ֣א לִמְלֹ֑ךְ כִּ֛י גַּ֥ם בְּמַלְכוּת֖וֹ נוֹלַ֥ד רָֽשׁ׃

15 ‏רָאִ֙יתִי֙ אֶת־כָּל־הַ֣חַיִּ֔ים הַֽמְהַלְּכִ֖ים תַּ֣חַת הַשָּׁ֑מֶשׁ עִ֚ם הַיֶּ֣לֶד הַשֵּׁנִ֔י אֲשֶׁ֥ר יַעֲמֹ֖ד תַּחְתָּֽיו׃

16 ‏אֵֽין־קֵ֣ץ לְכָל־הָעָ֗ם לְכֹ֤ל אֲשֶׁר־הָיָה֙ לִפְנֵיהֶ֔ם גַּ֥ם הָאַחֲרוֹנִ֖ים לֹ֣א יִשְׂמְחוּ־ב֑וֹ כִּֽי־גַם־זֶ֥ה הֶ֖בֶל וְרַעְי֥וֹן רֽוּחַ׃

17 ‏שְׁמֹ֣ר רגליך רַגְלְךָ֗ כַּאֲשֶׁ֤ר תֵּלֵךְ֙ אֶל־בֵּ֣ית הָאֱלֹהִ֔ים וְקָר֣וֹב לִשְׁמֹ֔עַ מִתֵּ֥ת הַכְּסִילִ֖ים זָ֑בַח כִּֽי־אֵינָ֥ם יוֹדְעִ֖ים לַעֲשׂ֥וֹת רָֽע׃

1 wəšaḇətî ’ănî wā’erə’eh ’eṯ-kāl-hā‘ăšuqîm ’ăšer na‘ăśîm taḥaṯ haššāmeš wəhinnēh| dimə‘aṯ hā‘ăšuqîm wə’ên lâem mənaḥēm ûmîyaḏ ‘ōšəqêhem kōḥa wə’ên lâem mənaḥēm:

2 wəšabēḥa ’ănî ’eṯ-hammēṯîm šekəḇār mēṯû min-haḥayyîm ’ăšer hēmmâ ḥayyîm ‘ăḏenâ:

3 wəṭwōḇ miššənêhem ’ēṯ ’ăšer-‘ăḏen lō’ hāyâ ’ăšer lō’-rā’â ’eṯ-hamma‘ăśeh hārā‘ ’ăšer na‘ăśâ taḥaṯ haššāmeš:

4 wərā’îṯî ’ănî ’eṯ-kāl-‘āmāl wə’ēṯ kāl-kišərwōn hamma‘ăśeh kî hî’ qinə’aṯ-’îš mērē‘ēhû gam-zeh heḇel ûrə‘ûṯ rûḥa:

5 hakəsîl ḥōḇēq ’eṯ-yāḏāyw wə’ōḵēl ’eṯ-bəśārwō:

6 ṭwōḇ məlō’ ḵaf nāḥaṯ mimməlō’ ḥāfənayim ‘āmāl ûrə‘ûṯ rûḥa:

7 wəšaḇətî ’ănî wā’erə’eh heḇel taḥaṯ haššāmeš:

8 yēš ’eḥāḏ wə’ên šēnî gam bēn wā’āḥ ’ên-lwō wə’ên qēṣ ləḵāl-‘ămālwō gam-‘ênāyw ‘ênwō lō’-ṯiśəba‘ ‘ōšer ûləmî| ’ănî ‘āmēl ûməḥassēr ’eṯ-nafəšî miṭṭwōḇâ gam-zeh heḇel wə‘inəyan rā‘ hû’:

9 ṭwōḇîm haššənayim min-hā’eḥāḏ ’ăšer yēš-lâem śāḵār ṭwōḇ ba‘ămālām:

10 kî ’im-yipōlû hā’eḥāḏ yāqîm ’eṯ-ḥăḇērwō wə’îlwō hā’eḥāḏ šeyyipwōl wə’ên šēnî lahăqîmwō:

11 gam ’im-yišəkəḇû šənayim wəḥam lâem ûlə’eḥāḏ ’êḵə yēḥām:

12 wə’im-yiṯəqəfwō hā’eḥāḏ haššənayim ya‘aməḏû neḡədwō wəhaḥûṭ haməšullāš lō’ ḇiməhērâ yinnāṯēq:

13 ṭwōḇ yeleḏ misəkēn wəḥāḵām mimmeleḵə zāqēn ûḵəsîl ’ăšer lō’-yāḏa‘ ləhizzâēr ‘wōḏ:

14 kî-mibêṯ hāsûrîm yāṣā’ liməlōḵə kî gam bəmaləḵûṯwō nwōlaḏ rāš:

15 rā’îṯî ’eṯ-kāl-haḥayyîm haməhalləḵîm taḥaṯ haššāmeš ‘im hayyeleḏ haššēnî ’ăšer ya‘ămōḏ taḥətāyw:

16 ’ên-qēṣ ləḵāl-hā‘ām ləḵōl ’ăšer-hāyâ lifənêhem gam hā’aḥărwōnîm lō’ yiśəməḥû-ḇwō kî-ḡam-zeh heḇel wəra‘əywōn rûḥa:

17 šəmōr raḡəleyḵā raḡələḵā ka’ăšer tēlēḵə ’el-bêṯ hā’ĕlōhîm wəqārwōḇ lišəmō‘a mitēṯ hakəsîlîm zāḇaḥ kî-’ênām ywōḏə‘îm la‘ăśwōṯ rā‘:


Next: Ecclesiastes (Qohelet) Chapter 5