Sacred Texts  Bible  Index 
Polyglot  KJV  Sep  Vul 

Deuteronomy (Devarim) Index
  Previous  Next 

Tanach (Hebrew): Deuteronomy (Devarim) Chapter 20

1 ‏כִּֽי־תֵצֵ֨א לַמִּלְחָמָ֜ה עַל־אֹיְבֶ֗יךָ וְֽרָאִ֜יתָ ס֤וּס וָרֶ֙כֶב֙ עַ֚ם רַ֣ב מִמְּךָ֔ לֹ֥א תִירָ֖א מֵהֶ֑ם כִּֽי־יְהוָ֤ה אֱלֹהֶ֙יךָ֙ עִמָּ֔ךְ הַמַּֽעַלְךָ֖ מֵאֶ֥רֶץ מִצְרָֽיִם׃

2 ‏וְהָיָ֕ה כְּקָֽרָבְכֶ֖ם אֶל־הַמִּלְחָמָ֑ה וְנִגַּ֥שׁ הַכֹּהֵ֖ן וְדִבֶּ֥ר אֶל־הָעָֽם׃

3 ‏וְאָמַ֤ר אֲלֵהֶם֙ שְׁמַ֣ע יִשְׂרָאֵ֔ל אַתֶּ֨ם קְרֵבִ֥ים הַיּ֛וֹם לַמִּלְחָמָ֖ה עַל־אֹיְבֵיכֶ֑ם אַל־יֵרַ֣ךְ לְבַבְכֶ֗ם אַל־תִּֽירְא֧וּ וְאַֽל־תַּחְפְּז֛וּ וְאַל־תַּֽעַרְצ֖וּ מִפְּנֵיהֶֽם׃

4 ‏כִּ֚י יְהוָ֣ה אֱלֹֽהֵיכֶ֔ם הַהֹלֵ֖ךְ עִמָּכֶ֑ם לְהִלָּחֵ֥ם לָכֶ֛ם עִם־אֹיְבֵיכֶ֖ם לְהוֹשִׁ֥יעַ אֶתְכֶֽם׃

5 ‏וְדִבְּר֣וּ הַשֹּֽׁטְרִים֮ אֶל־הָעָ֣ם לֵאמֹר֒ מִֽי־הָאִ֞ישׁ אֲשֶׁ֨ר בָּנָ֤ה בַֽיִת־חָדָשׁ֙ וְלֹ֣א חֲנָכ֔וֹ יֵלֵ֖ךְ וְיָשֹׁ֣ב לְבֵית֑וֹ פֶּן־יָמוּת֙ בַּמִּלְחָמָ֔ה וְאִ֥ישׁ אַחֵ֖ר יַחְנְכֶֽנּוּ׃

6 ‏וּמִֽי־הָאִ֞ישׁ אֲשֶׁר־נָטַ֥ע כֶּ֙רֶם֙ וְלֹ֣א חִלְּל֔וֹ יֵלֵ֖ךְ וְיָשֹׁ֣ב לְבֵית֑וֹ פֶּן־יָמוּת֙ בַּמִּלְחָמָ֔ה וְאִ֥ישׁ אַחֵ֖ר יְחַלְּלֶֽנּוּ׃

7 ‏וּמִֽי־הָאִ֞ישׁ אֲשֶׁר־אֵרַ֤שׂ אִשָּׁה֙ וְלֹ֣א לְקָחָ֔הּ יֵלֵ֖ךְ וְיָשֹׁ֣ב לְבֵית֑וֹ פֶּן־יָמוּת֙ בַּמִּלְחָמָ֔ה וְאִ֥ישׁ אַחֵ֖ר יִקָּחֶֽנָּה׃

8 ‏וְיָסְפ֣וּ הַשֹּׁטְרִים֮ לְדַבֵּ֣ר אֶל־הָעָם֒ וְאָמְר֗וּ מִי־הָאִ֤ישׁ הַיָּרֵא֙ וְרַ֣ךְ הַלֵּבָ֔ב יֵלֵ֖ךְ וְיָשֹׁ֣ב לְבֵית֑וֹ וְלֹ֥א יִמַּ֛ס אֶת־לְבַ֥ב אֶחָ֖יו כִּלְבָבֽוֹ׃

9 ‏וְהָיָ֛ה כְּכַלֹּ֥ת הַשֹּׁטְרִ֖ים לְדַבֵּ֣ר אֶל־הָעָ֑ם וּפָ֥קְד֛וּ3 שָׂרֵ֥י צְבָא֖וֹת בְּרֹ֥אשׁ הָעָֽם׃ ס

10 ‏כִּֽי־תִקְרַ֣ב אֶל־עִ֔יר לְהִלָּחֵ֖ם עָלֶ֑יהָ וְקָרָ֥אתָ אֵלֶ֖יהָ לְשָׁלֽוֹם׃

11 ‏וְהָיָה֙ אִם־שָׁל֣וֹם תַּֽעַנְךָ֔ וּפָתְחָ֖ה לָ֑ךְ וְהָיָ֞ה כָּל־הָעָ֣ם הַנִּמְצָא־בָ֗הּ יִהְי֥וּ לְךָ֛ לָמַ֖ס וַעֲבָדֽוּךָ׃

12 ‏וְאִם־לֹ֤א תַשְׁלִים֙ עִמָּ֔ךְ וְעָשְׂתָ֥ה עִמְּךָ֖ מִלְחָמָ֑ה וְצַרְתָּ֖ עָלֶֽיהָ׃

13 ‏וּנְתָנָ֛הּ יְהוָ֥ה אֱלֹהֶ֖יךָ בְּיָדֶ֑ךָ וְהִכִּיתָ֥ אֶת־כָּל־זְכוּרָ֖הּ לְפִי־חָֽרֶב׃

14 ‏רַ֣ק הַ֠נָּשִׁים וְהַטַּ֨ף וְהַבְּהֵמָ֜ה וְכֹל֩ אֲשֶׁ֨ר יִהְיֶ֥ה בָעִ֛יר כָּל־שְׁלָלָ֖הּ תָּבֹ֣ז לָ֑ךְ וְאָֽכַלְתָּ֙ אֶת־שְׁלַ֣ל אֹיְבֶ֔יךָ אֲשֶׁ֥ר נָתַ֛ן יְהוָ֥ה אֱלֹהֶ֖יךָ לָֽךְ׃

15 ‏כֵּ֤ן תַּעֲשֶׂה֙ לְכָל־הֶ֣עָרִ֔ים הָרְחֹקֹ֥ת מִמְּךָ֖ מְאֹ֑ד אֲשֶׁ֛ר לֹא־מֵעָרֵ֥י הַגּֽוֹיִם־הָאֵ֖לֶּה הֵֽנָּה׃

16 ‏רַ֗ק מֵעָרֵ֤י הָֽעַמִּים֙ הָאֵ֔לֶּה אֲשֶׁר֙ יְהוָ֣ה אֱלֹהֶ֔יךָ נֹתֵ֥ן לְךָ֖ נַחֲלָ֑ה לֹ֥א תְחַיֶּ֖ה כָּל־נְשָׁמָֽה׃

17 ‏כִּֽי־הַחֲרֵ֣ם תַּחֲרִימֵ֗ם הַחִתִּ֤י וְהָאֱמֹרִי֙ הַכְּנַעֲנִ֣י וְהַפְּרִזִּ֔י הַחִוִּ֖י וְהַיְבוּסִ֑י כַּאֲשֶׁ֥ר צִוְּךָ֖ יְהוָ֥ה אֱלֹהֶֽיךָ׃

18 ‏לְמַ֗עַן אֲשֶׁ֨ר לֹֽא־יְלַמְּד֤וּ אֶתְכֶם֙ לַעֲשׂ֔וֹת כְּכֹל֙ תּֽוֹעֲבֹתָ֔ם אֲשֶׁ֥ר עָשׂ֖וּ לֵֽאלֹהֵיהֶ֑ם וַחֲטָאתֶ֖ם לַיהוָ֥ה אֱלֹהֵיכֶֽם׃ ס

19 ‏כִּֽי־תָצ֣וּר אֶל־עִיר֩ יָמִ֨ים רַבִּ֜ים לְֽהִלָּחֵ֧ם עָלֶ֣יהָ לְתָפְשָׂ֗הּ לֹֽא־תַשְׁחִ֤ית אֶת־עֵצָהּ֙ לִנְדֹּ֤חַ עָלָיו֙ גַּרְזֶ֔ן כִּ֚י מִמֶּ֣נּוּ תֹאכֵ֔ל וְאֹת֖וֹ לֹ֣א תִכְרֹ֑ת כִּ֤י הָֽאָדָם֙ עֵ֣ץ הַשָּׂדֶ֔ה לָבֹ֥א מִפָּנֶ֖יךָ בַּמָּצֽוֹר׃

20 ‏רַ֞ק עֵ֣ץ אֲשֶׁר־תֵּדַ֗ע כִּֽי־לֹא־עֵ֤ץ מַאֲכָל֙ ה֔וּא אֹת֥וֹ תַשְׁחִ֖ית וְכָרָ֑תָּ וּבָנִ֣יתָ מָצ֗וֹר עַל־הָעִיר֙ אֲשֶׁר־הִ֨וא עֹשָׂ֧ה עִמְּךָ֛ מִלְחָמָ֖ה עַ֥ד רִדְתָּֽהּ׃ פ

1 kî-ṯēṣē’ lammiləḥāmâ ‘al-’ōyəḇeyḵā wərā’îṯā sûs wāreḵeḇ ‘am raḇ mimməḵā lō’ ṯîrā’ mēhem kî-yəhwâ ’ĕlōheyḵā ‘immāḵə hamma‘aləḵā mē’ereṣ miṣərāyim:

2 wəhāyâ kəqārāḇəḵem ’el-hammiləḥāmâ wənigaš hakōhēn wəḏiber ’el-hā‘ām:

3 wə’āmar ’ălēhem šəma‘ yiśərā’ēl ’atem qərēḇîm hayywōm lammiləḥāmâ ‘al-’ōyəḇêḵem ’al-yēraḵə ləḇaḇəḵem ’al-tîrə’û wə’al-taḥəpəzû wə’al-ta‘arəṣû mipənêhem:

4 kî yəhwâ ’ĕlōhêḵem hahōlēḵə ‘immāḵem ləhillāḥēm lāḵem ‘im-’ōyəḇêḵem ləhwōšî‘a ’eṯəḵem:

5 wəḏibərû haššōṭərîm ’el-hā‘ām lē’mōr mî-hā’îš ’ăšer bānâ ḇayiṯ-ḥāḏāš wəlō’ ḥănāḵwō yēlēḵə wəyāšōḇ ləḇêṯwō pen-yāmûṯ bammiləḥāmâ wə’îš ’aḥēr yaḥənəḵennû:

6 ûmî-hā’îš ’ăšer-nāṭa‘ kerem wəlō’ ḥilləlwō yēlēḵə wəyāšōḇ ləḇêṯwō pen-yāmûṯ bammiləḥāmâ wə’îš ’aḥēr yəḥalləlennû:

7 ûmî-hā’îš ’ăšer-’ēraś ’iššâ wəlō’ ləqāḥāh yēlēḵə wəyāšōḇ ləḇêṯwō pen-yāmûṯ bammiləḥāmâ wə’îš ’aḥēr yiqqāḥennâ:

8 wəyāsəfû haššōṭərîm ləḏabēr ’el-hā‘ām wə’āmərû mî-hā’îš hayyārē’ wəraḵə hallēḇāḇ yēlēḵə wəyāšōḇ ləḇêṯwō wəlō’ yimmas ’eṯ-ləḇaḇ ’eḥāyw kiləḇāḇwō:

9 wəhāyâ kəḵallōṯ haššōṭərîm ləḏabēr ’el-hā‘ām ûfāqəḏû3 śārê ṣəḇā’wōṯ bərō’š hā‘ām: s

10 kî-ṯiqəraḇ ’el-‘îr ləhillāḥēm ‘āleyhā wəqārā’ṯā ’ēleyhā ləšālwōm:

11 wəhāyâ ’im-šālwōm ta‘anəḵā ûfāṯəḥâ lāḵə wəhāyâ kāl-hā‘ām hanniməṣā’-ḇāh yihəyû ləḵā lāmas wa‘ăḇāḏûḵā:

12 wə’im-lō’ ṯašəlîm ‘immāḵə wə‘āśəṯâ ‘imməḵā miləḥāmâ wəṣarətā ‘āleyhā:

13 ûnəṯānāh yəhwâ ’ĕlōheyḵā bəyāḏeḵā wəhikîṯā ’eṯ-kāl-zəḵûrāh ləfî-ḥāreḇ:

14 raq hannāšîm wəhaṭṭaf wəhabəhēmâ wəḵōl ’ăšer yihəyeh ḇā‘îr kāl-šəlālāh tāḇōz lāḵə wə’āḵalətā ’eṯ-šəlal ’ōyəḇeyḵā ’ăšer nāṯan yəhwâ ’ĕlōheyḵā lāḵə:

15 kēn ta‘ăśeh ləḵāl-he‘ārîm hārəḥōqōṯ mimməḵā mə’ōḏ ’ăšer lō’-mē‘ārê hagwōyim-hā’ēlleh hēnnâ:

16 raq mē‘ārê hā‘ammîm hā’ēlleh ’ăšer yəhwâ ’ĕlōheyḵā nōṯēn ləḵā naḥălâ lō’ ṯəḥayyeh kāl-nəšāmâ:

17 kî-haḥărēm taḥărîmēm haḥitî wəhā’ĕmōrî hakəna‘ănî wəhapərizzî haḥiûî wəhayəḇûsî ka’ăšer ṣiûəḵā yəhwâ ’ĕlōheyḵā:

18 ləma‘an ’ăšer lō’-yəlamməḏû ’eṯəḵem la‘ăśwōṯ kəḵōl twō‘ăḇōṯām ’ăšer ‘āśû lē’lōhêhem waḥăṭā’ṯem layhwâ ’ĕlōhêḵem: s

19 kî-ṯāṣûr ’el-‘îr yāmîm rabîm ləhillāḥēm ‘āleyhā ləṯāfəśāh lō’-ṯašəḥîṯ ’eṯ-‘ēṣāh linədōḥa ‘ālāyw garəzen kî mimmennû ṯō’ḵēl wə’ōṯwō lō’ ṯiḵərōṯ kî hā’āḏām ‘ēṣ haśśāḏeh lāḇō’ mipāneyḵā bammāṣwōr:

20 raq ‘ēṣ ’ăšer-tēḏa‘ kî-lō’-‘ēṣ ma’ăḵāl hû’ ’ōṯwō ṯašəḥîṯ wəḵārātā ûḇānîṯā māṣwōr ‘al-hā‘îr ’ăšer-hiw’ ‘ōśâ ‘imməḵā miləḥāmâ ‘aḏ riḏətāh: f


Next: Deuteronomy (Devarim) Chapter 21