‎1 ‏וַיֹּ֣אמֶר דָּוִ֔יד זֶ֣ה ה֔וּא בֵּ֖ית יְהוָ֣ה הָאֱלֹהִ֑ים וְזֶה־מִּזְבֵּ֥חַ לְעֹלָ֖ה לְיִשְׂרָאֵֽל׃ ס

‎2 ‏וַיֹּ֣אמֶר דָּוִ֔יד לִכְנוֹס֙ אֶת־הַגֵּרִ֔ים אֲשֶׁ֖ר בְּאֶ֣רֶץ יִשְׂרָאֵ֑ל וַיַּעֲמֵ֣ד חֹֽצְבִ֗ים לַחְצוֹב֙ אַבְנֵ֣י גָזִ֔ית לִבְנ֖וֹת בֵּ֥ית הָאֱלֹהִֽים׃

‎3 ‏וּבַרְזֶ֣ל׀ לָ֠רֹב לַֽמִּסְמְרִ֞ים לְדַלְת֧וֹת הַשְּׁעָרִ֛ים וְלַֽמְחַבְּר֖וֹת הֵכִ֣ין דָּוִ֑יד וּנְחֹ֥שֶׁת לָרֹ֖ב אֵ֥ין מִשְׁקָֽל׃

‎4 ‏וַעֲצֵ֥י אֲרָזִ֖ים לְאֵ֣ין מִסְפָּ֑ר כִּֽי הֵ֠בִיאוּ הַצִּֽידֹנִ֨ים וְהַצֹּרִ֜ים עֲצֵ֧י אֲרָזִ֛ים לָרֹ֖ב לְדָוִֽיד׃ פ

‎5 ‏וַיֹּ֣אמֶר דָּוִ֗יד שְׁלֹמֹ֣ה בְנִי֮ נַ֣עַר וָרָךְ֒ וְהַבַּ֜יִת לִבְנ֣וֹת לַיהוָ֗ה לְהַגְדִּ֨יל׀ לְמַ֜עְלָה לְשֵׁ֤ם וּלְתִפְאֶ֙רֶת֙ לְכָל־הָ֣אֲרָצ֔וֹת אָכִ֥ינָה נָּ֖א ל֑וֹ וַיָּ֧כֶן דָּוִ֛יד לָרֹ֖ב לִפְנֵ֥י מוֹתֽוֹ׃

‎6 ‏וַיִּקְרָ֖א לִשְׁלֹמֹ֣ה בְנ֑וֹ וַיְצַוֵּ֙הוּ֙ לִבְנ֣וֹת בַּ֔יִת לַיהוָ֖ה אֱלֹהֵ֥י יִשְׂרָאֵֽל׃ ס

‎7 ‏וַיֹּ֥אמֶר דָּוִ֖יד לִשְׁלֹמֹ֑ה בנו בְּנִ֕י אֲנִי֙ הָיָ֣ה עִם־לְבָבִ֔י לִבְנ֣וֹת בַּ֔יִת לְשֵׁ֖ם יְהוָ֥ה אֱלֹהָֽי׃

‎8 ‏וַיְהִ֨י עָלַ֤י דְּבַר־יְהוָה֙ לֵאמֹ֔ר דָּ֤ם לָרֹב֙ שָׁפַ֔כְתָּ וּמִלְחָמ֥וֹת גְּדֹל֖וֹת עָשִׂ֑יתָ לֹֽא־תִבְנֶ֥ה בַ֙יִת֙ לִשְׁמִ֔י כִּ֚י דָּמִ֣ים רַבִּ֔ים שָׁפַ֥כְתָּ אַ֖רְצָה לְפָנָֽי׃

‎9 ‏הִנֵּה־בֵ֞ן נוֹלָ֣ד לָ֗ךְ ה֤וּא יִהְיֶה֙ אִ֣ישׁ מְנוּחָ֔ה וַהֲנִח֥וֹתִי ל֛וֹ מִכָּל־אוֹיְבָ֖יו מִסָּבִ֑יב כִּ֤י שְׁלֹמֹה֙ יִהְיֶ֣ה שְׁמ֔וֹ וְשָׁל֥וֹם וָשֶׁ֛קֶט אֶתֵּ֥ן עַל־יִשְׂרָאֵ֖ל בְּיָמָֽיו׃

‎10 ‏הֽוּא־יִבְנֶ֥ה בַ֙יִת֙ לִשְׁמִ֔י וְהוּא֙ יִהְיֶה־לִּ֣י לְבֵ֔ן וַאֲנִי־ל֖וֹ לְאָ֑ב וַהֲכִ֨ינוֹתִ֜י כִּסֵּ֧א מַלְכוּת֛וֹ עַל־יִשְׂרָאֵ֖ל עַד־עוֹלָֽם׃

‎11 ‏עַתָּ֣ה בְנִ֔י יְהִ֥י יְהוָ֖ה עִמָּ֑ךְ וְהִצְלַחְתָּ֗ וּבָנִ֙יתָ֙ בֵּ֚ית יְהוָ֣ה אֱלֹהֶ֔יךָ כַּאֲשֶׁ֖ר דִּבֶּ֥ר עָלֶֽיךָ׃

‎12 ‏אַ֣ךְ יִֽתֶּן־לְּךָ֤ יְהוָה֙ שֵׂ֣כֶל וּבִינָ֔ה וִֽיצַוְּךָ֖ עַל־יִשְׂרָאֵ֑ל וְלִשְׁמ֕וֹר אֶת־תּוֹרַ֖ת יְהוָ֥ה אֱלֹהֶֽיךָ׃

‎13 ‏אָ֣ז תַּצְלִ֔יחַ אִם־תִּשְׁמ֗וֹר לַעֲשׂוֹת֙ אֶת־הַֽחֻקִּ֣ים וְאֶת־הַמִּשְׁפָּטִ֔ים אֲשֶׁ֨ר צִוָּ֧ה יְהוָ֛ה אֶת־מֹשֶׁ֖ה עַל־יִשְׂרָאֵ֑ל חֲזַ֣ק וֶאֱמָ֔ץ אַל־תִּירָ֖א וְאַל־תֵּחָֽת׃

‎14 ‏וְהִנֵּ֨ה בְעָנְיִ֜י הֲכִינ֣וֹתִי לְבֵית־יְהוָ֗ה זָהָ֞ב כִּכָּרִ֤ים מֵֽאָה־אֶ֙לֶף֙ וְכֶ֗סֶף אֶ֤לֶף אֲלָפִים֙ כִּכָּרִ֔ים וְלַנְּחֹ֤שֶׁת וְלַבַּרְזֶל֙ אֵ֣ין מִשְׁקָ֔ל כִּ֥י לָרֹ֖ב הָיָ֑ה וְעֵצִ֤ים וַאֲבָנִים֙ הֲכִינ֔וֹתִי וַעֲלֵיהֶ֖ם תּוֹסִֽיף׃

‎15 ‏וְעִמְּךָ֤ לָרֹב֙ עֹשֵׂ֣י מְלָאכָ֔ה חֹצְבִ֕ים וְחָרָשֵׁ֥י אֶ֖בֶן וָעֵ֑ץ וְכָל־חָכָ֖ם בְּכָל־מְלָאכָֽה׃

‎16 ‏לַזָּהָ֥ב לַכֶּ֛סֶף וְלַנְּחֹ֥שֶׁת וְלַבַּרְזֶ֖ל אֵ֣ין מִסְפָּ֑ר ק֣וּם וַעֲשֵׂ֔ה וִיהִ֥י יְהוָ֖ה עִמָּֽךְ׃

‎17 ‏וַיְצַ֤ו דָּוִיד֙ לְכָל־שָׂרֵ֣י יִשְׂרָאֵ֔ל לַעְזֹ֖ר לִשְׁלֹמֹ֥ה בְנֽוֹ׃

‎18 ‏הֲלֹ֨א יְהוָ֤ה אֱלֹֽהֵיכֶם֙ עִמָּכֶ֔ם וְהֵנִ֥יחַ לָכֶ֖ם מִסָּבִ֑יב כִּ֣י׀ נָתַ֣ן בְּיָדִ֗י אֵ֚ת יֹשְׁבֵ֣י הָאָ֔רֶץ וְנִכְבְּשָׁ֥ה הָאָ֛רֶץ לִפְנֵ֥י יְהוָ֖ה וְלִפְנֵ֥י עַמּֽוֹ׃

‎19 ‏עַתָּ֗ה תְּנ֤וּ לְבַבְכֶם֙ וְנַפְשְׁכֶ֔ם לִדְר֖וֹשׁ לַיהוָ֣ה אֱלֹהֵיכֶ֑ם וְק֗וּמוּ וּבְנוּ֙ אֶת־מִקְדַּשׁ֙³ יְהוָ֣ה הָֽאֱלֹהִ֔ים לְהָבִ֞יא אֶת־אֲר֣וֹן בְּרִית־יְהוָ֗ה וּכְלֵי֙ קֹ֣דֶשׁ הָֽאֱלֹהִ֔ים לַבַּ֖יִת הַנִּבְנֶ֥ה לְשֵׁם־יְהוָֽה׃ פ

1 wayyō’mer dāwîḏ zeh hû’ bêṯ yəhwâ hā’ĕlōhîm wəzeh-mmizəbēḥa lə‘ōlâ ləyiśərā’ēl: s

2 wayyō’mer dāwîḏ liḵənwōs ’eṯ-hagērîm ’ăšer bə’ereṣ yiśərā’ēl wayy^a‘ămēḏ ḥōṣəḇîm l^aḥəṣwōḇ ’aḇənê ḡāzîṯ liḇənwōṯ bêṯ hā’ĕlōhîm:

3 ûḇarəzel| lārōḇ lammisəmərîm ləḏaləṯwōṯ haššə‘ārîm wəlaməḥabərwōṯ hēḵîn dāwîḏ ûnəḥōšeṯ lārōḇ ’ên mišəqāl:

4 w^a‘ăṣê ’ărāzîm lə’ên misəpār kî hēḇî’û haṣṣîḏōnîm wəhaṣṣōrîm ‘ăṣê ’ărāzîm lārōḇ ləḏāwîḏ: f

5 wayyō’mer dāwîḏ šəlōmōh ḇənî n^a‘ar wārāḵə wəhabayiṯ liḇənwōṯ layhwâ ləhaḡədîl| ləm^a‘əlâ ləšēm ûləṯifə’ereṯ ləḵāl-hā’ărāṣwōṯ ’āḵînâ nnā’ lwō wayyāḵen dāwîḏ lārōḇ lifənê mwōṯwō:

6 wayyiqərā’ lišəlōmōh ḇənwō wayəṣaûēhû liḇənwōṯ bayiṯ layhwâ ’ĕlōhê yiśərā’ēl: s

7 wayyō’mer dāwîḏ lišəlōmōh bənwō bənî ’ănî hāyâ ‘im-ləḇāḇî liḇənwōṯ bayiṯ ləšēm yəhwâ ’ĕlōhāy:

8 wayəhî ‘ālay dəḇar-yəhwâ lē’mōr dām lārōḇ šāfaḵətā ûmiləḥāmwōṯ gəḏōlwōṯ ‘āśîṯā lō’-ṯiḇəneh ḇayiṯ lišəmî kî dāmîm rabîm šāfaḵətā ’arəṣâ ləfānāy:

9 hinnēh-ḇēn nwōlāḏ lāḵə hû’ yihəyeh ’îš mənûḥâ wahăniḥwōṯî lwō mikāl-’wōyəḇāyw missāḇîḇ kî šəlōmōh yihəyeh šəmwō wəšālwōm wāšeqeṭ ’etēn ‘al-yiśərā’ēl bəyāmāyw:

10 hû’-yiḇəneh ḇayiṯ lišəmî wəhû’ yihəyeh-llî ləḇēn wa’ănî-lwō lə’āḇ wahăḵînwōṯî kissē’ maləḵûṯwō ‘al-yiśərā’ēl ‘aḏ-‘wōlām:

11 ‘atâ ḇənî yəhî yəhwâ ‘immāḵə wəhiṣəl^aḥətā ûḇānîṯā bêṯ yəhwâ ’ĕlōheyḵā ka’ăšer diber ‘āleyḵā:

12 ’aḵə yiten-lləḵā yəhwâ śēḵel ûḇînâ wîṣaûəḵā ‘al-yiśərā’ēl wəlišəmwōr ’eṯ-twōraṯ yəhwâ ’ĕlōheyḵā:

13 ’āz taṣəlîḥa ’im-tišəmwōr l^a‘ăśwōṯ ’eṯ-h^aḥuqqîm wə’eṯ-hammišəpāṭîm ’ăšer ṣiûâ yəhwâ ’eṯ-mōšeh ‘al-yiśərā’ēl ḥăzaq we’ĕmāṣ ’al-tîrā’ wə’al-tēḥāṯ:

14 wəhinnēh ḇə‘ānəyî hăḵînwōṯî ləḇêṯ-yəhwâ zâāḇ kikārîm mē’â-’elef wəḵesef ’elef ’ălāfîm kikārîm wəlannəḥōšeṯ wəlabarəzel ’ên mišəqāl kî lārōḇ hāyâ wə‘ēṣîm wa’ăḇānîm hăḵînwōṯî w^a‘ălêhem twōsîf:

15 wə‘imməḵā lārōḇ ‘ōśê məlā’ḵâ ḥōṣəḇîm wəḥārāšê ’eḇen wā‘ēṣ wəḵāl-ḥāḵām bəḵāl-məlā’ḵâ:

16 lazzâāḇ lakesef wəlannəḥōšeṯ wəlabarəzel ’ên misəpār qûm w^a‘ăśēh wîhî yəhwâ ‘immāḵə:

17 wayəṣaw dāwîḏ ləḵāl-śārê yiśərā’ēl l^a‘əzōr lišəlōmōh ḇənwō:

18 hălō’ yəhwâ ’ĕlōhêḵem ‘immāḵem wəhēnîḥa lāḵem missāḇîḇ kî| nāṯan bəyāḏî ’ēṯ yōšəḇê hā’āreṣ wəniḵəbəšâ hā’āreṣ lifənê yəhwâ wəlifənê ‘ammwō:

19 ‘atâ tənû ləḇaḇəḵem wənafəšəḵem liḏərwōš layhwâ ’ĕlōhêḵem wəqûmû ûḇənû ’eṯ-miqədaš³ yəhwâ hā’ĕlōhîm ləhāḇî’ ’eṯ-’ărwōn bərîṯ-yəhwâ ûḵəlê qōḏeš hā’ĕlōhîm labayiṯ hanniḇəneh ləšēm-yəhwâ: f