Sacred Texts  Bible  Index 
Polyglot  KJV  Sep  Vul 

1 Chronicles (1 Divrey Yamim) Index
  Previous  Next 

Tanach (Hebrew): 1 Chronicles (1 Divrey Yamim) Chapter 10

1 ‏וּפְלִשְׁתִּ֖ים נִלְחֲמ֣וּ בְיִשְׂרָאֵ֑ל וַיָּ֑נָס אִֽישׁ־יִשְׂרָאֵל֙ מִפְּנֵ֣י פְלִשְׁתִּ֔ים וַיִּפְּל֥וּ חֲלָלִ֖ים בְּהַ֥ר גִּלְבֹּֽעַ׃

2 ‏וַיַּדְבְּק֣וּ פְלִשְׁתִּ֔ים אַחֲרֵ֥י שָׁא֖וּל וְאַחֲרֵ֣י בָנָ֑יו וַיַּכּ֣וּ פְלִשְׁתִּ֗ים אֶת־יוֹנָתָ֧ן וְאֶת־אֲבִינָדָ֛ב וְאֶת־מַלְכִּי־שׁ֖וּעַ בְּנֵ֥י שָׁאֽוּל׃

3 ‏וַתִּכְבַּ֤ד הַמִּלְחָמָה֙ עַל־שָׁא֔וּל וַיִּמְצָאֻ֖הוּ הַמּוֹרִ֣ים בַּקָּ֑שֶׁת וַיָּ֖חֶל מִן־הַיּוֹרִֽים׃

4 ‏וַיֹּ֣אמֶר שָׁאוּל֩ אֶל־נֹשֵׂ֨א כֵלָ֜יו שְׁלֹ֥ף חַרְבְּךָ֣׀ וְדָקְרֵ֣נִי בָ֗הּ פֶּן־יָבֹ֜אוּ הָעֲרֵלִ֤ים הָאֵ֙לֶּה֙ וְהִתְעַלְּלוּ־בִ֔י וְלֹ֤א אָבָה֙ נֹשֵׂ֣א כֵלָ֔יו כִּ֥י יָרֵ֖א מְאֹ֑ד סוַיִּקַּ֤ח שָׁאוּל֙ אֶת־הַחֶ֔רֶב וַיִּפֹּ֖ל עָלֶֽיהָ׃

5 ‏וַיַּ֥רְא נֹשֵֽׂא־כֵלָ֖יו כִּ֣י מֵ֣ת שָׁא֑וּל וַיִּפֹּ֥ל גַּם־ה֛וּא עַל־הַחֶ֖רֶב וַיָּמֹֽת׃ ס

6 ‏וַיָּ֤מָת שָׁאוּל֙ וּשְׁלֹ֣שֶׁת בָּנָ֔יו וְכָל־בֵּית֖וֹ יַחְדָּ֥ו מֵֽתוּ׃

7 ‏וַ֠יִּרְאוּ כָּל־אִ֨ישׁ יִשְׂרָאֵ֤ל אֲשֶׁר־בָּעֵ֙מֶק֙ כִּ֣י נָ֔סוּ וְכִי־מֵ֖תוּ שָׁא֣וּל וּבָנָ֑יו וַיַּעַזְב֤וּ עָרֵיהֶם֙ וַיָּנֻ֔סוּ וַיָּבֹ֣אוּ פְלִשְׁתִּ֔ים וַיֵּשְׁב֖וּ בָּהֶֽם׃ ס

8 ‏וַיְהִי֙ מִֽמָּחֳרָ֔ת וַיָּבֹ֣אוּ פְלִשְׁתִּ֔ים לְפַשֵּׁ֖ט אֶת־הַֽחֲלָלִ֑ים וַֽיִּמְצְא֤וּ אֶת־שָׁאוּל֙ וְאֶת־בָּנָ֔יו נֹפְלִ֖ים בְּהַ֥ר גִּלְבֹּֽעַ׃

9 ‏וַיַּ֨פְשִׁיטֻ֔הוּ וַיִּשְׂא֥וּ אֶת־רֹאשׁ֖וֹ וְאֶת־כֵּלָ֑יו וַיְשַׁלְּח֨וּ בְאֶֽרֶץ־פְלִשְׁתִּ֜ים1 סָבִ֗יב לְבַשֵּׂ֛ר אֶת־עֲצַבֵּיהֶ֖ם וְאֶת־הָעָֽם׃

10 ‏וַיָּשִׂ֙ימוּ֙ אֶת־כֵּלָ֔יו בֵּ֖ית אֱלֹהֵיהֶ֑ם וְאֶת־גֻּלְגָּלְתּ֥וֹ תָקְע֖וּ בֵּ֥ית דָּגֽוֹן׃ ס

11 ‏וַֽיִּשְׁמְע֔וּ כֹּ֖ל יָבֵ֣ישׁ גִּלְעָ֑ד אֵ֛ת כָּל־אֲשֶׁר־עָשׂ֥וּ פְלִשְׁתִּ֖ים לְשָׁאֽוּל׃

12 ‏וַיָּקוּמוּ֮ כָּל־אִ֣ישׁ חַיִל֒ וַיִּשְׂא֞וּ אֶת־גּוּפַ֣ת שָׁא֗וּל וְאֵת֙ גּוּפֹ֣ת בָּנָ֔יו וַיְבִיא֖וּם יָבֵ֑ישָׁה וַיִּקְבְּר֨וּ אֶת־עַצְמוֹתֵיהֶ֜ם תַּ֤חַת הָאֵלָה֙ בְּיָבֵ֔שׁ וַיָּצ֖וּמוּ שִׁבְעַ֥ת יָמִֽים׃

13 ‏וַיָּ֣מָת שָׁא֗וּל בְּמַֽעֲלוֹ֙ אֲשֶׁ֣ר מָעַ֣ל בַּֽיהוָ֔ה עַל־דְּבַ֥ר יְהוָ֖ה אֲשֶׁ֣ר לֹא־שָׁמָ֑ר וְגַם־לִשְׁא֥וֹל בָּא֖וֹב לִדְרֽוֹשׁ׃

14 ‏וְלֹֽא־דָרַ֥שׁ בַּֽיהוָ֖ה וַיְמִיתֵ֑הוּ וַיַּסֵּב֙ אֶת־הַמְּלוּכָ֔ה לְדָוִ֖יד בֶּן־יִשָֽׁי׃ פ

1 ûfəlišətîm niləḥămû ḇəyiśərā’ēl wayyānās ’îš-yiśərā’ēl mipənê fəlišətîm wayyipəlû ḥălālîm bəhar giləbō‘a:

2 wayyaḏəbəqû fəlišətîm ’aḥărê šā’ûl wə’aḥărê ḇānāyw wayyakû fəlišətîm ’eṯ-ywōnāṯān wə’eṯ-’ăḇînāḏāḇ wə’eṯ-maləkî-šû‘a bənê šā’ûl:

3 watiḵəbaḏ hammiləḥāmâ ‘al-šā’ûl wayyiməṣā’uhû hammwōrîm baqqāšeṯ wayyāḥel min-hayywōrîm:

4 wayyō’mer šā’ûl ’el-nōśē’ ḵēlāyw šəlōf ḥarəbəḵā| wəḏāqərēnî ḇāh pen-yāḇō’û hā‘ărēlîm hā’ēlleh wəhiṯə‘alləlû-ḇî wəlō’ ’āḇâ nōśē’ ḵēlāyw kî yārē’ mə’ōḏ swayyiqqaḥ šā’ûl ’eṯ-haḥereḇ wayyipōl ‘āleyhā:

5 wayyarə’ nōśē’-ḵēlāyw kî mēṯ šā’ûl wayyipōl gam-hû’ ‘al-haḥereḇ wayyāmōṯ: s

6 wayyāmāṯ šā’ûl ûšəlōšeṯ bānāyw wəḵāl-bêṯwō yaḥədāw mēṯû:

7 wayyirə’û kāl-’îš yiśərā’ēl ’ăšer-bā‘ēmeq kî nāsû wəḵî-mēṯû šā’ûl ûḇānāyw wayya‘azəḇû ‘ārêhem wayyānusû wayyāḇō’û fəlišətîm wayyēšəḇû bâem: s

8 wayəhî mimmāḥŏrāṯ wayyāḇō’û fəlišətîm ləfaššēṭ ’eṯ-haḥălālîm wayyiməṣə’û ’eṯ-šā’ûl wə’eṯ-bānāyw nōfəlîm bəhar giləbō‘a:

9 wayyafəšîṭuhû wayyiśə’û ’eṯ-rō’šwō wə’eṯ-kēlāyw wayəšalləḥû ḇə’ereṣ-fəlišətîm1 sāḇîḇ ləḇaśśēr ’eṯ-‘ăṣabêhem wə’eṯ-hā‘ām:

10 wayyāśîmû ’eṯ-kēlāyw bêṯ ’ĕlōhêhem wə’eṯ-guləgālətwō ṯāqə‘û bêṯ dāḡwōn: s

11 wayyišəmə‘û kōl yāḇêš gilə‘āḏ ’ēṯ kāl-’ăšer-‘āśû fəlišətîm ləšā’ûl:

12 wayyāqûmû kāl-’îš ḥayil wayyiśə’û ’eṯ-gûfaṯ šā’ûl wə’ēṯ gûfōṯ bānāyw wayəḇî’ûm yāḇêšâ wayyiqəbərû ’eṯ-‘aṣəmwōṯêhem taḥaṯ hā’ēlâ bəyāḇēš wayyāṣûmû šiḇə‘aṯ yāmîm:

13 wayyāmāṯ šā’ûl bəma‘ălwō ’ăšer mā‘al bayhwâ ‘al-dəḇar yəhwâ ’ăšer lō’-šāmār wəḡam-lišə’wōl bā’wōḇ liḏərwōš:

14 wəlō’-ḏāraš bayhwâ wayəmîṯēhû wayyassēḇ ’eṯ-hamməlûḵâ ləḏāwîḏ ben-yišāy: f


Next: 1 Chronicles (1 Divrey Yamim) Chapter 11