Sacred Texts  Bible  Index 
Polyglot  KJV  Sep  Vul 

Amos Index
  Previous  Next 

Tanach (Hebrew): Amos Chapter 8

1 ‏כֹּ֥ה הִרְאַ֖נִי אֲדֹנָ֣י יְהוִ֑ה וְהִנֵּ֖ה כְּל֥וּב קָֽיִץ׃

2 ‏וַיֹּ֗אמֶר מָֽה־אַתָּ֤ה רֹאֶה֙ עָמ֔וֹס וָאֹמַ֖ר כְּל֣וּב קָ֑יִץ וַיֹּ֨אמֶר יְהוָ֜ה אֵלַ֗י בָּ֤א הַקֵּץ֙ אֶל־עַמִּ֣י יִשְׂרָאֵ֔ל לֹא־אוֹסִ֥יף ע֖וֹד עֲב֥וֹר לֽוֹ׃

3 ‏וְהֵילִ֜ילוּ שִׁיר֤וֹת הֵיכָל֙ בַּיּ֣וֹם הַה֔וּא נְאֻ֖ם אֲדֹנָ֣י יְהוִ֑ה רַ֣ב הַפֶּ֔גֶר בְּכָל־מָק֖וֹם הִשְׁלִ֥יךְ הָֽס׃ פ

4 ‏שִׁמְעוּ־זֹ֕את הַשֹּׁאֲפִ֖ים אֶבְי֑וֹן וְלַשְׁבִּ֖ית ענוי־ עֲנִיֵּי־ אָֽרֶץ׃

5 ‏לֵאמֹ֗ר מָתַ֞י יַעֲבֹ֤ר הַחֹ֙דֶשׁ֙ וְנַשְׁבִּ֣ירָה שֶּׁ֔בֶר וְהַשַּׁבָּ֖ת וְנִפְתְּחָה־בָּ֑ר לְהַקְטִ֤ין אֵיפָה֙ וּלְהַגְדִּ֣יל שֶׁ֔קֶל וּלְעַוֵּ֖ת מֹאזְנֵ֥י מִרְמָֽה׃

6 ‏לִקְנ֤וֹת בַּכֶּ֙סֶף֙ דַּלִּ֔ים וְאֶבְי֖וֹן בַּעֲב֣וּר נַעֲלָ֑יִם וּמַפַּ֥ל בַּ֖ר נַשְׁבִּֽיר׃

7 ‏נִשְׁבַּ֥ע יְהוָ֖ה בִּגְא֣וֹן יַעֲקֹ֑ב אִם־אֶשְׁכַּ֥ח לָנֶ֖צַח כָּל־מַעֲשֵׂיהֶֽם׃

8 ‏הַ֤עַל זֹאת֙ לֹֽא־תִרְגַּ֣ז הָאָ֔רֶץ וְאָבַ֖ל כָּל־יוֹשֵׁ֣ב בָּ֑הּ וְעָלְתָ֤ה כָאֹר֙ כֻּלָּ֔הּ וְנִגְרְשָׁ֥ה ונשקה וְנִשְׁקְעָ֖ה כִּיא֥וֹר מִצְרָֽיִם׃ ס

9 ‏וְהָיָ֣ה׀ בַּיּ֣וֹם הַה֗וּא נְאֻם֙ אֲדֹנָ֣י יְהוִ֔ה וְהֵבֵאתִ֥י הַשֶּׁ֖מֶשׁ בַּֽצָּהֳרָ֑יִם וְהַחֲשַׁכְתִּ֥י לָאָ֖רֶץ בְּי֥וֹם אֽוֹר׃

10 ‏וְהָפַכְתִּ֨י חַגֵּיכֶ֜ם לְאֵ֗בֶל וְכָל־שִֽׁירֵיכֶם֙ לְקִינָ֔ה וְהַעֲלֵיתִ֤י עַל־כָּל־מָתְנַ֙יִם֙ שָׂ֔ק וְעַל־כָּל־רֹ֖אשׁ קָרְחָ֑ה וְשַׂמְתִּ֙יהָ֙ כְּאֵ֣בֶל יָחִ֔יד וְאַחֲרִיתָ֖הּ כְּי֥וֹם מָֽר׃

11 ‏הִנֵּ֣ה׀ יָמִ֣ים בָּאִ֗ים נְאֻם֙ אֲדֹנָ֣י יְהוִ֔ה וְהִשְׁלַחְתִּ֥י רָעָ֖ב בָּאָ֑רֶץ לֹֽא־רָעָ֤ב לַלֶּ֙חֶם֙ וְלֹֽא־צָמָ֣א לַמַּ֔יִם כִּ֣י אִם־לִשְׁמֹ֔עַ אֵ֖ת דִּבְרֵ֥י יְהוָֽה׃

12 ‏וְנָעוּ֙ מִיָּ֣ם עַד־יָ֔ם וּמִצָּפ֖וֹן וְעַד־מִזְרָ֑ח יְשֽׁוֹטְט֛וּ לְבַקֵּ֥שׁ אֶת־דְּבַר־יְהוָ֖ה וְלֹ֥א יִמְצָֽאוּ׃

13 ‏בַּיּ֨וֹם הַה֜וּא תִּ֠תְעַלַּפְנָה הַבְּתוּלֹ֧ת הַיָּפ֛וֹת וְהַבַּחוּרִ֖ים בַּצָּמָֽא׃

14 ‏הַנִּשְׁבָּעִים֙ בְּאַשְׁמַ֣ת שֹֽׁמְר֔וֹן וְאָמְר֗וּ חֵ֤י אֱלֹהֶ֙יךָ֙ דָּ֔ן וְחֵ֖י דֶּ֣רֶךְ בְּאֵֽר־שָׁ֑בַע וְנָפְל֖וּ וְלֹא־יָק֥וּמוּ עֽוֹד׃ ס

1 kōh hirə’anî ’ăḏōnāy yəhwih wəhinnēh kəlûḇ qāyiṣ:

2 wayyō’mer mâ-’atâ rō’eh ‘āmwōs wā’ōmar kəlûḇ qāyiṣ wayyō’mer yəhwâ ’ēlay bā’ haqqēṣ ’el-‘ammî yiśərā’ēl lō’-’wōsîf ‘wōḏ ‘ăḇwōr lwō:

3 wəhêlîlû šîrwōṯ hêḵāl bayywōm hahû’ nə’um ’ăḏōnāy yəhwih raḇ hapeḡer bəḵāl-māqwōm hišəlîḵə hās: f

4 šimə‘û-zō’ṯ haššō’ăfîm ’eḇəywōn wəlašəbîṯ ‘anəwê- ‘ănîyê- ’āreṣ:

5 lē’mōr māṯay ya‘ăḇōr haḥōḏeš wənašəbîrâ ššeḇer wəhaššabāṯ wənifətəḥâ-bār ləhaqəṭîn ’êfâ ûləhaḡədîl šeqel ûlə‘aûēṯ mō’zənê mirəmâ:

6 liqənwōṯ bakesef dallîm wə’eḇəywōn ba‘ăḇûr na‘ălāyim ûmapal bar našəbîr:

7 nišəba‘ yəhwâ biḡə’wōn ya‘ăqōḇ ’im-’ešəkaḥ lāneṣaḥ kāl-ma‘ăśêhem:

8 ha‘al zō’ṯ lō’-ṯirəgaz hā’āreṣ wə’āḇal kāl-ywōšēḇ bāh wə‘āləṯâ ḵā’ōr kullāh wəniḡərəšâ wənišəqâ wənišəqə‘â kî’wōr miṣərāyim: s

9 wəhāyâ| bayywōm hahû’ nə’um ’ăḏōnāy yəhwih wəhēḇē’ṯî haššemeš baṣṣâŏrāyim wəhaḥăšaḵətî lā’āreṣ bəywōm ’wōr:

10 wəhāfaḵətî ḥagêḵem lə’ēḇel wəḵāl-šîrêḵem ləqînâ wəha‘ălêṯî ‘al-kāl-māṯənayim śāq wə‘al-kāl-rō’š qārəḥâ wəśamətîhā kə’ēḇel yāḥîḏ wə’aḥărîṯāh kəywōm mār:

11 hinnēh| yāmîm bā’îm nə’um ’ăḏōnāy yəhwih wəhišəlaḥətî rā‘āḇ bā’āreṣ lō’-rā‘āḇ lalleḥem wəlō’-ṣāmā’ lammayim kî ’im-lišəmō‘a ’ēṯ diḇərê yəhwâ:

12 wənā‘û mîyām ‘aḏ-yām ûmiṣṣāfwōn wə‘aḏ-mizərāḥ yəšwōṭəṭû ləḇaqqēš ’eṯ-dəḇar-yəhwâ wəlō’ yiməṣā’û:

13 bayywōm hahû’ tiṯə‘allafənâ habəṯûlōṯ hayyāfwōṯ wəhabaḥûrîm baṣṣāmā’:

14 hannišəbā‘îm bə’ašəmaṯ šōmərwōn wə’āmərû ḥê ’ĕlōheyḵā dān wəḥê dereḵə bə’ēr-šāḇa‘ wənāfəlû wəlō’-yāqûmû ‘wōḏ: s


Next: Amos Chapter 9