‎1 ‏שִׁמְע֞וּ הַדָּבָ֣ר הַזֶּ֗ה פָּר֤וֹת הַבָּשָׁן֙ אֲשֶׁר֙ בְּהַ֣ר שֹֽׁמְר֔וֹן הָעֹשְׁק֣וֹת דַּלִּ֔ים הָרֹצְצ֖וֹת אֶבְיוֹנִ֑ים הָאֹמְרֹ֥ת לַאֲדֹֽנֵיהֶ֖ם הָבִ֥יאָה וְנִשְׁתֶּֽה׃

‎2 ‏נִשְׁבַּ֨ע אֲדֹנָ֤י יְהוִה֙ בְּקָדְשׁ֔וֹ כִּ֛י הִנֵּ֥ה יָמִ֖ים בָּאִ֣ים עֲלֵיכֶ֑ם וְנִשָּׂ֤א אֶתְכֶם֙ בְּצִנּ֔וֹת וְאַחֲרִיתְכֶ֖ן בְּסִיר֥וֹת דּוּגָֽה׃

‎3 ‏וּפְרָצִ֥ים תֵּצֶ֖אנָה אִשָּׁ֣ה נֶגְדָּ֑הּ וְהִשְׁלַכְתֶּ֥נָה הַהַרְמ֖וֹנָה נְאֻם־יְהוָֽה׃

‎4 ‏בֹּ֤אוּ בֵֽית־אֵל֙ וּפִשְׁע֔וּ הַגִּלְגָּ֖ל הַרְבּ֣וּ לִפְשֹׁ֑עַ וְהָבִ֤יאוּ לַבֹּ֙קֶר֙ זִבְחֵיכֶ֔ם לִשְׁלֹ֥שֶׁת יָמִ֖ים מַעְשְׂרֹֽתֵיכֶֽם׃

‎5 ‏וְקַטֵּ֤ר מֵֽחָמֵץ֙ תּוֹדָ֔ה וְקִרְא֥וּ נְדָב֖וֹת הַשְׁמִ֑יעוּ כִּ֣י כֵ֤ן אֲהַבְתֶּם֙ בְּנֵ֣י יִשְׂרָאֵ֔ל נְאֻ֖ם אֲדֹנָ֥י יְהוִֽה׃

‎6 ‏וְגַם־אֲנִי֩ נָתַ֨תִּי לָכֶ֜ם נִקְי֤וֹן שִׁנַּ֙יִם֙ בְּכָל־עָ֣רֵיכֶ֔ם וְחֹ֣סֶר לֶ֔חֶם בְּכֹ֖ל מְקוֹמֹֽתֵיכֶ֑ם וְלֹֽא־שַׁבְתֶּ֥ם עָדַ֖י נְאֻם־יְהוָֽה׃

‎7 ‏וְגַ֣ם אָנֹכִי֩ מָנַ֨עְתִּי מִכֶּ֜ם אֶת־הַגֶּ֗שֶׁם בְּע֨וֹד שְׁלֹשָׁ֤ה חֳדָשִׁים֙ לַקָּצִ֔יר וְהִמְטַרְתִּי֙ עַל־עִ֣יר אֶחָ֔ת וְעַל־עִ֥יר אַחַ֖ת לֹ֣א אַמְטִ֑יר חֶלְקָ֤ה אַחַת֙ תִּמָּטֵ֔ר וְחֶלְקָ֛ה אֲשֶֽׁר־לֹֽא־תַמְטִ֥יר עָלֶ֖יהָ תִּיבָֽשׁ׃

‎8 ‏וְנָע֡וּ שְׁתַּיִם֩ שָׁלֹ֨שׁ עָרִ֜ים אֶל־עִ֥יר אַחַ֛ת לִשְׁתּ֥וֹת מַ֖יִם וְלֹ֣א יִשְׂבָּ֑עוּ וְלֹֽא־שַׁבְתֶּ֥ם עָדַ֖י נְאֻם־יְהוָֽה׃

‎9 ‏הִכֵּ֣יתִי אֶתְכֶם֮ בַּשִּׁדָּפ֣וֹן וּבַיֵּרָקוֹן֒ הַרְבּ֨וֹת גַּנּוֹתֵיכֶ֧ם וְכַרְמֵיכֶ֛ם וּתְאֵנֵיכֶ֥ם וְזֵיתֵיכֶ֖ם יֹאכַ֣ל הַגָּזָ֑ם וְלֹֽא־שַׁבְתֶּ֥ם עָדַ֖י נְאֻם־יְהוָֽה׃ ס

‎10 ‏שִׁלַּ֨חְתִּי בָכֶ֥ם דֶּ֙בֶר֙ בְּדֶ֣רֶךְ מִצְרַ֔יִם הָרַ֤גְתִּי בַחֶ֙רֶב֙ בַּח֣וּרֵיכֶ֔ם עִ֖ם שְׁבִ֣י סֽוּסֵיכֶ֑ם וָאַעֲלֶ֞ה בְּאֹ֤שׁ מַחֲנֵיכֶם֙ וּֽבְאַפְּכֶ֔ם וְלֹֽא־שַׁבְתֶּ֥ם עָדַ֖י נְאֻם־יְהוָֽה׃

‎11 ‏הָפַ֣כְתִּי בָכֶ֗ם כְּמַהְפֵּכַ֤ת אֱלֹהִים֙ אֶת־סְדֹ֣ם וְאֶת־עֲמֹרָ֔ה וַתִּהְי֕וּ כְּא֖וּד מֻצָּ֣ל מִשְּׂרֵפָ֑ה וְלֹֽא־שַׁבְתֶּ֥ם עָדַ֖י נְאֻם־יְהוָֽה׃ ס

‎12 ‏לָכֵ֕ן כֹּ֥ה אֶעֱשֶׂה־לְּךָ֖ יִשְׂרָאֵ֑ל עֵ֚קֶב כִּֽי־זֹ֣את אֶֽעֱשֶׂה־לָּ֔ךְ הִכּ֥וֹן לִקְרַאת־אֱלֹהֶ֖יךָ יִשְׂרָאֵֽל׃

‎13 ‏כִּ֡י הִנֵּה֩ יוֹצֵ֨ר הָרִ֜ים וּבֹרֵ֣א ר֗וּחַ וּמַגִּ֤יד לְאָדָם֙ מַה־שֵּׂח֔וֹ עֹשֵׂ֥ה שַׁ֙חַר֙ עֵיפָ֔ה וְדֹרֵ֖ךְ עַל־בָּ֣מֳתֵי אָ֑רֶץ יְהוָ֥ה אֱלֹהֵֽי־צְבָא֖וֹת שְׁמֽוֹ׃ ס

1 šimə‘û hadāḇār hazzeh pārwōṯ habāšān ’ăšer bəhar šōmərwōn hā‘ōšəqwōṯ dallîm hārōṣəṣwōṯ ’eḇəywōnîm hā’ōmərōṯ la’ăḏōnêhem hāḇî’â wənišəteh:

2 nišəb^a‘ ’ăḏōnāy yəhwih bəqāḏəšwō kî hinnēh yāmîm bā’îm ‘ălêḵem wəniśśā’ ’eṯəḵem bəṣinnwōṯ wə’^aḥărîṯəḵen bəsîrwōṯ dûḡâ:

3 ûfərāṣîm tēṣe’nâ ’iššâ neḡədāh wəhišəlaḵətenâ haharəmwōnâ nə’um-yəhwâ:

4 bō’û ḇêṯ-’ēl ûfišə‘û hagiləgāl harəbû lifəšō‘a wəhāḇî’û labōqer ziḇəḥêḵem lišəlōšeṯ yāmîm m^a‘əśərōṯêḵem:

5 wəqaṭṭēr mēḥāmēṣ twōḏâ wəqirə’û nəḏāḇwōṯ hašəmî‘û kî ḵēn ’ăhaḇətem bənê yiśərā’ēl nə’um ’ăḏōnāy yəhwih:

6 wəḡam-’ănî nāṯatî lāḵem niqəywōn šinnayim bəḵāl-‘ārêḵem wəḥōser leḥem bəḵōl məqwōmōṯêḵem wəlō’-šaḇətem ‘āḏay nə’um-yəhwâ:

7 wəḡam ’ānōḵî mān^a‘ətî mikem ’eṯ-hagešem bə‘wōḏ šəlōšâ ḥŏḏāšîm laqqāṣîr wəhiməṭarətî ‘al-‘îr ’eḥāṯ wə‘al-‘îr ’^aḥaṯ lō’ ’aməṭîr ḥeləqâ ’^aḥaṯ timmāṭēr wəḥeləqâ ’ăšer-lō’-ṯaməṭîr ‘āleyhā tîḇāš:

8 wənā‘û šətayim šālōš ‘ārîm ’el-‘îr ’^aḥaṯ lišətwōṯ mayim wəlō’ yiśəbā‘û wəlō’-šaḇətem ‘āḏay nə’um-yəhwâ:

9 hikêṯî ’eṯəḵem baššidāfwōn ûḇayyērāqwōn harəbwōṯ gannwōṯêḵem wəḵarəmêḵem ûṯə’ēnêḵem wəzêṯêḵem yō’ḵal hagāzām wəlō’-šaḇətem ‘āḏay nə’um-yəhwâ: s

10 šill^aḥətî ḇāḵem deḇer bəḏereḵə miṣərayim hāraḡətî ḇ^aḥereḇ b^aḥûrêḵem ‘im šəḇî sûsêḵem wā’^a‘ăleh bə’ōš m^aḥănêḵem ûḇə’apəḵem wəlō’-šaḇətem ‘āḏay nə’um-yəhwâ:

11 hāfaḵətî ḇāḵem kəmahəpēḵaṯ ’ĕlōhîm ’eṯ-səḏōm wə’eṯ-‘ămōrâ watihəyû kə’ûḏ muṣṣāl miśśərēfâ wəlō’-šaḇətem ‘āḏay nə’um-yəhwâ: s

12 lāḵēn kōh ’e‘ĕśeh-lləḵā yiśərā’ēl ‘ēqeḇ kî-zō’ṯ ’e‘ĕśeh-llāḵə hikwōn liqəra’ṯ-’ĕlōheyḵā yiśərā’ēl:

13 kî hinnēh ywōṣēr hārîm ûḇōrē’ rûḥa ûmagîḏ lə’āḏām mah-śśēḥwō ‘ōśēh š^aḥar ‘êfâ wəḏōrēḵə ‘al-bāmŏṯê ’āreṣ yəhwâ ’ĕlōhê-ṣəḇā’wōṯ šəmwō: s